राजनीतिइ चलखेलै चलखेल

येँ (नेपालभाषा टाइम्स) – प्रधानमन्त्री केपी ओलीं ३८ पेजया पौ च्वयाः बियादीगु लिसःयात नेकपाया मेम्ह अध्यक्ष पुष्पकमल दाहालं नं पौ हे च्वयाः लिसः बीगु जूगु दु । उकिया लागिं दाहाल म्हीगंनिसें थः म्ह्याय्या छेँय् च्वनाः लेखनय् व्यस्त जुयादीगु खँ सीदुगु दु । वय्कः म्हीग सुथय् ७ बजेनिसें करिब ११ घन्टा तक धोलाय्हितिस्थित म्ह्याय्या छेँय् च्वनादीगु खः ।

मेखे पार्टीया विवाद तच्वया वनेवं राष्ट्रपति विद्यादेवी भण्डारीं उपप्रधानमन्त्री ईश्वर पोखरेलयात सःताः विवाद ज्यंकेत निर्देशन बियादीगु खँ सीदुगु दु । थ्व स्वयां न्ह्यः राष्ट्रपति भण्डारीं वामदेव गौतमयात सःताः अज्याःगु निर्देशन बियादीगु खः । थुपालय् वामदेव गौतमयात अज्याःगु इनाप यायेगु लागिं पुलांम्ह सभामुख कृष्णबहादुर महरा सक्रिय जुयादीगु खँ सीदुगु दु । म्हीग महरा गौतमया छेँय् झायाः पार्टीया समस्या बारे खँल्हाबल्हा यानादीगु खः ।

मेखे पार्टीया वरिष्ठ नेता माधव नेपालयात कांग्रेसया विवादास्पद सांसद अमरेशकुमार सिंहं नापलानादीगु खँ सीदुगु दु । अमरेशकुमारयात भारतीय संस्थापन पक्षया लाइन हइम्ह ‘दूत’ या रूपय् काये गु याः । थज्याःगु हे परिस्थितिइ प्रधानसेनापति पूर्णचन्द्र थापां वालुवाटार वनाः प्रधानमन्त्री केपी ओलीयात नापलानादीगु खँ नं पिहां वःगु दु ।

सम्बन्धित बुखँ

LEAVE YOUR COMMENTS