सम्पदा लागाय् म्हितूपिंसं क्षमा फ्वन

यल – लाय्कू लागाया सांस्कृतिक सम्पदाय् पार्कर र फ्रि रनिङ म्हिताः भिडियो दयेकूपिं ल्याय्म्हतय्त ज्वनाः माफी फ्वंकेगु ज्या याःगु दु ।
म्हिगः थनया देगः व देगलय् च्वंगु ल्वहंयाम्ह किसिं तिन्हुयाः भिडियो खिचे यानाच्वंपिं थ्व ल्याय्म्हतय्त स्थानीय वृद्धतय्सं याये मते धकाः पं वंबलय् उमित हे ‘थ्व छंगु जग्गा खः ला ? न्यादँ कुना बी’ धकाः दुर्वचन छ्यःगु खः ।

वयांलि सम्पदा संरक्षण महा–अभियानपाखें अभियन्ता यादवलाल कायस्थ व स्थानीय मनूतय्सं म्हिगः प्रहरी चौकीइ उजुरी तयाः विकास तामांग व बबी कुमाल नांया निम्ह ल्याय्म्हतय्त ज्वंगु खः । उमिसं प्रहरी चौकीइ हे म्हिगः अपमान याःम्ह स्थानीय वृद्ध समक्ष क्षमा फ्वँसें सम्पदा क्षेत्रय् थथे म्हिते मजिउगु खँ सिल धकाः धाःगु खः ।

उमिसं पार्कर व फ्रि रनिङ धाःगु धाःगु कासाया अनलाइन धेंधेंबल्लाः कासाय् ब्वति कायेत अथे यानागु खँ नं धाःगु दु ।