सत्ताय् थ्यनेवं कांग्रेसय् ल्वापु
येँ (नेपालभाषा टाइम्स)- विपक्षय् च्वंत्तले मिले जुयाः च्वनेगु व सरकारय् वनेवं थःथः ल्वायेगु कांग्रेसया पुलांगु हे ल्वय् खः । आः नं सरकारय् वनेवं हे कांग्रेसय् थ्व पुलांगु ल्वय् खने दया वःगु दु । एमाले अध्यक्ष केपी शर्मा ओलीया नेतृत्वय् गठन जूगु सरकारय् सामेल जूगु कांग्रेस दुने मन्त्री ल्ययेगु खँय् सभापति शेरबहादुर देउवा व संस्थापन इतर नेता शेखर कोइराला पक्षया दथुइ तीव्र मतभेदव पिहां वःगु खँ सीदुगु दु ।
संघय् गठन जूगु ओली नेतृत्वया सरकारय् कांग्रेसया भागय् वःगु झिगू मन्त्रालय मध्ये कोइराला पक्षयात स्वंगू जक मन्त्रालय बिल धकाः तीव्र असन्तोष पिहां वःगु दु । थ्व खँय् विवाद जुयाच्वंगु हे इलय् आः थीथी प्रदेशय् गठन जुयाच्वंगु प्रादेशिक सरकारय् नं थःपिंत माक्व मन्त्रालय मबिउ धकाः कोइराला पक्षं विरोध प्वंका हःगु दु । एमालेलिसे जूगु सहमति कथं कांग्रेसया भागय् बागमती, गण्डकी व सुदूरपश्चिम प्रदेश लाःवःगु खः । आः प्रदेशय् सरकार गठन यायेगु ज्याय् नं थःपिंलिसे छुं हे सहलह मयासे देउवा पक्षं थः मनूतय्त जक मन्त्री दयेकाच्वन धकाः कोइराला पक्षं असन्तोष प्वंकाहःगु दु ।
लुम्बिनी प्रदेशय् देउवां विवादास्पद मनूतय्त समेत मन्त्री दयेकाः कोइराला पक्षधरतय्त धाःसा वास्ता हे मयाः द्वपं बिउगु दु । लुम्बिनी प्रदेशय् थःपिंत भूमिकाविहिन दयेकल धकाः नं कोइराला पक्षं द्वपं बिउगु दु ।
थ्वहे विषययात कयाः कोइराला व महामन्त्री गगन थापा पुचःया अलग बैठक च्वनाः चिउताः प्वंकेगु ज्या जूगु दु । थ्व पुचलं कोशीइ २, बागमतीइ ३, गण्डकीइ २, लुम्बिनीइ २, कर्णालीइ १ व सुदुरपश्चिमय् १ यानाः न्हय्गू प्रदेशय् मुक्कं ११ गू मन्त्रालय माग याःगु खः । तर कोइराला–गगन पक्षं प्रस्तुत याःगु मागयात देउवा पक्षं वास्ता हे मयाःगु खँ धाःगु दु । थःपिनि बैठक च्वनाच्वँच्वं हे शेखर कोइरालां देउवायात फोन यानाः थःपिनि माग न्ह्यब्वःगु खः । तर देउवां उगु फोनयात बांलाक ‘रेस्पोन्स’ मयाःगु खँ धाःगु दु । थुकिं यानाः विवाद अझ तच्वयेफुगु खँ नं धाःगु दु ।
LEAVE YOUR COMMENTS