एसइइ पास जूपिंत भिंतुना व लसकुस

ख्वप – सरस्वति विद्यागृह माध्यमिक विद्यालयं २०७४ सालया एसइइ परीक्षाय् उत्तीर्ण जूपिं विद्यार्थीतय्त भिंतुना देछाःगु दु । विद्यालय व्यवस्थापन समितिया अध्यक्ष कृष्ण बनमालाया सभापतित्वय् जूगु ज्याझ्वलय् ख्वप नगरपालिकाया प्रमुख सुनिल प्रजापति मूपाहांकथं झायादीगु खः ।

ज्याझ्वलय् नवासें प्रमुख प्रजापतिं शिक्षकतय्सं गुणस्तरीय शिक्षा बिउसा जक हरेक विद्यार्थी देशभक्त जुयाः देय्यात छुं योगदान बीपिं जुयाः पिहां वइ धयादिल । गुगुं नं विद्यालयया बांलाः वा बांमलाः धकाः मापन यायेगु उगु विद्यालयया भौतिक संरचना स्वयाः मखु धासे लगनशील शिक्षक व मेहनती विद्यार्थीया कारणं मापन जुइ धयादिल ।

उगु हे ज्याझ्वलय् ख्वपया साविकया ३ वडाया पुलांम्ह वडाअध्यक्षनापं व्यवस्थापन समितिइ तःदँ तक च्वनाः सेवा यानादीम्ह विष्णुबहादुर मानन्धरयात दोसल्लां न्ययेकाः हनादीगु खःसा न्हूगु व्यवस्थापन समितिया दुजःपिंत लसकुस नं याःगु खः ।

ज्याझ्वलय् ख्वप नगरपालिका वडा नं. ९ या वडाअध्यक्ष रविन्द्र ज्याख्वः, जिल्ला समन्वय समितिया प्रमुख हरि दाहाल, प्रधानाध्यापक पुण्यराम सुवाल, लगायतं नुगःखँ तयादीगु ज्याझ्वलय् सांस्कृतिक ज्याझ्वः नं न्ह्यब्वःगु खः ।