बुइगु चुनावय् जक जनजाति !
येँ (नेपालभाषा टाइम्स)- न्ह्यःने वयाच्वंगु राष्ट्रपति चुनावय् एमालें पार्टीया जनजाति नेता सुभाष नेम्बाङयात उम्मेदवार दयेकेवं राजनीतिक पार्टीतय्सं बुइगु चुनावय् जनजातियात न्ह्यःने तइगु धकाः न्हापां वयाच्वंगु द्वपं हानं छक्वः पुष्टि जूगु दु ।
न्हापा एमाले व माओवादीया गठबन्धन बांलाक न्ह्यानाच्वंगु इलय् राष्ट्रपति पद एमालेयात वइगु निश्चित जुयाच्वंगु खः । उगु इलय् एमालें बिष्णु रिमाल व डोरमणि पौडेलया नां न्ह्यःने हयाच्वंगु खः । जब माओवादीलिसेया गठबन्धन त्वाःदलाः राष्ट्रपति पद थःगु ल्हातय् मलाइगु निश्चित जुल, वयां लिपा धाःसा सुभाष नेम्बाङयात न्ह्यःने तये हःगु चर्चा जूगु दु ।
विश्लेषकतय् दावी कथं एमाले जक मखु, थ्व मामिलाय् नेपाली कांग्रेसया पहः नं वहे खः । कांग्रेसं आः थःपिं त्याइगु निश्चित जूगु इलय् रामचन्द्र पौडेलयात राष्ट्रपतिया उम्मेदवार दयेकूगु दु । थ्व स्वयां न्ह्यः वि.सं. २०७२ सालया कार्तिकय् जब राष्ट्रपतिया चुनाव जुल, उकी एमालेया विद्या भण्डारी त्याइगु निश्चित जूगु खः । उगु चुनावय् धाःसा कुलबहादुर गुरुङयात राष्ट्रपतिया उम्मेदवार दयेकूगु खः । उगु इलय् भण्डारीयात ३२७ मत वःगु खःसा गुरुङयात २१४ जक मत वःगु खः ।
वयां लिपा २०७४ सालया फागुनय् हानं राष्ट्रपतिया चुनाव जुल । उकी नं एमाले व माओवादीया गठबन्धनं विद्या भण्डारीयात हे उम्मेदवार दयेकल । उकी नं कांग्रेस बुइगु निश्चित दुगु खः । अथे बुइगु निश्चित जूगु चुनावय् नं कांग्रेसं जनजाति नेता लक्ष्मी राईयात उम्मेदवार दयेकूगु खः । आः थुगुसी राष्ट्रपति पदय् त्याइगु निश्चित दुगु इलय् धाःसा राई व गुरुङ निम्हेसितं त्वःताः पौडेलयात उम्मेदवार दयेकूगु दु ।
देय्या न्हापांम्ह राष्ट्रपति निर्वाचित याःगु इलय् नं शुरुइ कांग्रेसपाखें गिरिजाप्रसाद कोइरालां हे दावी याःगु खः । तर थःगु बहुमत दुगु तत्कालीन माओवादी नेतृत्वं रामराजाप्रसाद सिंहयात न्ह्यःने हयेवं कांग्रेसं रामवरण यादवयात न्ह्यःने तःगु खः । तर माओवादीया आन्तरिक समीकरण मिले मजुइवं भाग्यवश रामवरण यादव निर्वाचित जूवंगु खः । अबले नं कांग्रेसं यादवयात त्याइगु निश्चित जुयाः उम्मेदवार दयेकूगु मखु ।
बुइगु चुनाव जुल धाःसा जनजाति यात न्ह्यःने तयेगु थ्व प्रवृत्ति थुगुसी एमालें नं लिसा कयाः क्यंगु चर्चा जुयाच्वंगु दु ।
LEAVE YOUR COMMENTS