समानुपातिक ८० प्रतिशत क्वचाल

येँ (नेपालभाषा टाइम्स)- वंगु मंसिर ४ गते क्वचाःगु प्रतिनिधिसभा व प्रदेशसभाया निर्वाचनया समानुपातिक प्रणालीपाखेया मतगणना ८० प्रतिशत क्वचाःगु दु ।
वंगु निर्वाचनय् मुक्कं १ करोड ७९ लाख ८ हजार ८५० म्ह मतदाता दुगुली ६१ प्रतिशत मत कुहां वंगु अनुमान याःगु दु । उकी मध्ये म्हिगः तक ८० प्रतिशत मतगणना क्वचायेधुंकूगु दुसा आः २४ लाख मत ल्याः खाये ल्यं दनि ।

म्हिगःतक क्वचाःगु मतगणना कथं नेकपा एमाले २४ लाख १३ हजार २२२ मत हयाः दकलय् न्ह्यःने लानाच्वंगु दु । अथे हे नेपाली कांग्रेस २२ लाख ९४ हजार ९८३ मत हयाः निगूगु थासय् लानाच्वंगु दु ।

उकथं हे १० लाख १६ हजार ६७९ मत हयाः नेकपा माओवादी केन्द्र स्वंगूगु थासय् लानाच्वंगु दुसा १० लाख ८ हजार २४० मत हयाः राष्ट्रिय स्वतन्त्र पार्टी प्यंगूगु थासय् लानाच्वंगु दु । राष्ट्रिय प्रजातन्त्र पार्टी ५ लाख १३ हजार हयाः न्यागूगु थासय् लानाच्वंगु दुसा ३ लाख ३ हजार मत हयाः जनता समाजवादी पार्टी खुगूगु थासय् लानाच्वंगु दु ।
अथे हे नेकपा एकीकृत समाजवादी पार्टी २ लाख ३८ हजार मत हयाः न्हय्गूगु थासय् लानाच्वंगु दु । थ्व पार्टीं ३ प्रतिशतया थ्रेस होल्ड पूवंकीगु सम्भावना अप्वया वनाच्वंगु दु । उकथं हे जनमत पार्टीं २ लाख ३४ हजार, नागरिक उन्मुक्ति पार्टीं २ लाख २ हजार व लोसपां १ लाख २२ हजार मत हःगु दु ।

सम्बन्धित बुखँ

LEAVE YOUR COMMENTS