सतकय् हे चायेकल वडा ज्याकू

येँ (नेपालभाषा टाइम्स)-येँ मनपां ऐतिहासिक न्हूसतकया पेटी तब्या यानाः सतक चिब्या यायेत कथं न्ह्याकूगु कुतः विरुद्ध संघर्ष यानाच्वंम्ह येँ मनपा २२ वडाया अध्यक्ष चिनिकाजी महर्जनं म्हिगः भूगोलपार्क पिने सतकय् हे च्वनाः वडा ज्याकू सञ्चालन यानादिल ।

उगु लागाय् मनपाया डोजरं सतक काटे याः वइ धकाः वडा अध्यक्ष महर्जन लगायत स्थानीयवासी वंगु स्वन्हु न्ह्यवंनिसें चान्हय् समेत धर्ना च्वनाच्वंगु दु । मनपां छुं नं इलय् डोजर चले यायेफु धकाः महर्जनं म्हिगः वडा ज्याकू समेत पिने सतकय् हे सञ्चालन यानाः धर्ना जारी यानादीगु खः । न्हू सतकय् मनपां यानाच्वंगु ज्या रोके मयाःतले विरोध स्वरुप सतकय् हे च्वनाः वडा ज्याकू चले यायेगु खँ वय्कलं कनादीगु दु ।

थ्वहे झ्वलय् म्हिगः येँ मनपा वडा नं. २२, २३ व २४ या स्थानीय जनतापाखें छगू विज्ञप्ति पिकासें थःपिंसं शान्तिपूर्ण विरोध यानाच्वनागु खःसा नगर प्रहरी व मेपिं छुुं मनूतय्सं आतंक ब्वलंकाः प्रदर्शनयात जबर्जस्ती हिंसात्मक दयेकेगु स्वयाच्वंगु द्वपं बिउगु दु । विज्ञप्तिइ धयातःगु दु, ‘जिमिगु विरोध ज्याझ्वलय् छिं (मेयरं) खटे याःपिं नगर प्रहरी व मेपिं छुं मनूतय्सं थःगु वैधानिक अधिकार, अनुशासन व कार्य क्षेत्र हाचां गायाः थीथी कथंया ल्वाभः ज्वनाः स्थानीययात ख्याच्वः बीगु ज्या यानाच्वंगुलिं अज्याःगु ज्या तुरुन्त दिकेत इनाप याना । थुकिं यानाः परिस्थितिं हिंसात्मक रुप काल धाःसा थुकिया फुक्क जिम्मेवार छि हे जुइ ।’

थ्वहे झ्वलय् फुटपाथ विस्तार विरुद्ध आन्दोलन यानाच्वंम्ह २२ वडाया वडा अध्यक्ष चिनकाजी महर्जनं विरोध कथं म्हिगः सतकं हे सर्वसाधारण जनताया ज्या याःगु खः । फुटपाथ विस्तार निर्णय लित मकाल धाःसा २२ वडाया फुक्कं ज्या सतकं हे यायेगु खँ नं वय्कलं धयादीगु दु ।

न्हूसतकया थ्व आन्दोलनय् ऐक्य– वद्धता क्यनेत म्हिगः ३२ गुलिं वडाया अध्यक्ष व सदस्यत वयाः न्हूसतकय् धर्ना च्वंगु खः । थ्व धर्ना लिपा न्हूसतकय् तयातःगु डोजर लित यंकाः आः वंघलय् दिके यंकूगु दु ।