ओमिक्रोनविरुद्ध आःया खोपं ज्या याइ : डब्ल्यूएचओ

एजेन्सी- विश्व स्वास्थ्य संगठन (डब्ल्यूएचओं) कोरोनाया न्हूगु भेरियन्ट ओमिक्रोनविरुद्ध थौंकन्हय् छ्यलाच्वंगु कोरोनाविरुद्धया खोपं ज्या याइगु खँ धाःगु दु । थुपिं खोप ओमिक्रोनपाखें संक्रमित जूसां गम्भीर अवस्था थ्यनीगु जोखिमपाखें बचे यायेत सक्षम दुगु खँ डब्ल्यूएचओं धाःगु खः ।

दक्षिण अफ्रिकाय् यानास्वःगु न्हापांगु प्रयोगशालाय् परीक्षणय् ओमिक्रोनं फाइजर खोपयात आंशिक रुपं छले यायेफुगु खनेदयेधुंकाः डब्ल्यूएचओं थ्व घोषणा याःगु खः । डब्ल्यूएचओया डा. माइक रायनं खोपया असर मेमेगु भेरियन्टया तुलनाय् ओमिक्रोनय् म्हो जुइ धयागु संकेत छुं नं खनेमदुगु खँ धयादीगु खः ।

डब्ल्यूएचओया आपतकालीन कार्यक्रमया कार्यकारी निर्देशक रायनं एएफपीलिसे खँ ल्हासें धयादीगु दु, ‘झीके तसकं प्रभावकारी खोपत दु, गुगु गम्भीर ल्वय् मजुइकेगु व अस्पताल यंकेमाःगु अवस्था मवयेकेगु सन्दर्भय् आःतक फुक्कं भेरियन्टविरुद्ध प्रभावकारी खनेदयाच्वंगु दु । ओमिक्रोनविरुद्ध थथे जुइमखु धयागु बिचाः यायेमाःगु छुं कारण मदु ।’

प्रारम्भिक तथ्यांक कथं ओमिक्रोनं मनूतय्त डेल्टा भेरियन्ट व मेमेगु स्ट्रेनं स्वयां अप्वः विरामी मयाइगु खनेदुगु जानकारी नं वय्कलं बियादीगु दु ।

ओमिक्रोन आःतक लुइकूगु कोभिडया थीथी भेरियन्ट मध्ये दकलय् अप्वः उत्परिवतर्तित भेरियन्ट खः । थ्व भेरियन्ट दकलय् न्हापां दक्षिण अफ्रिकाय् खनेदुगु खः । थ्व भेरियन्टया कारणं दक्षिण अफ्रिकाय् तःकः कोरोना जूपिं ल्वगितय् ल्याः अप्वया वयाच्वंगु दु ।

थ्व भेरियन्टविरुद्ध आः दुगु खोपं ज्या वइगु धाःसां थ्व भेरियन्टं मनूतय्त गुलि तक गम्भीर प्रभाव लाकी धयागु खँ धाःसा अझं स्पष्ट मजूनि । अमेरिकाया वरिष्ठ संक्रामक रोग विशेषज्ञ डा. एन्थोनी फाउचीं प्रारम्भिक प्रमाणतय् ल्याः ओमिक्रोन तसकं संक्रामक जूसां थुकिं मनूतय्त तुलनात्मक रुपं गम्भीर अवस्थाय् तक थ्यंकीगु खनेमदु धयादीगु दु ।

सम्बन्धित बुखँ

LEAVE YOUR COMMENTS