निर्वाणमूर्ति विहारय् परित्राण पाठ

येँ – स्वयम्भू किण्डोलय् च्वंगु निर्वाणमूर्ति विहारय् वंगु शनिवाः पवित्र महापरित्राण पाठ यायेगु ज्या जुल । उगु ऐतिहासिक विहारय् वंगु च्यादँ न्ह्यवंनिसें दँय्दसं नेपाः नापं विश्व शान्तिया कामना यासें भिक्षु महासंघपाखें थथेपरित्राण पाठ जुया वयाच्वंगु दु ।

निर्वाणमूर्ति विहारया प्रमुख डा. धम्मविजया गुरुमां व विहारया ग्वसालय् थ्व परित्राण पाठया ज्या जुया वयाच्वंगु खः । थुगुसी जूगु परित्राण च्याक्वःगु खः । भिक्षु धर्ममूर्ति महास्थविरया नेतृत्वय् भिक्षु महासंघपाखें उगु परित्राण पाठ यायेगु ज्या जूगु खः ।

ज्याझ्वलय् श्रद्धेय धम्मावती गुरुमांलिसें थीथी विहारं बिज्याःपिं भिक्षु, गुरुमां व आपालं उपासक उपासिकापिनि उपस्थिति दुगु खः । ज्याझ्वलय् धर्मदेशना, महापरित्राण पाठ, भोजन, दानप्रदान, अष्टपरिस्कार दान, पुण्यानुमोदनया लिसें सुथय् धर्मकीर्ति ज्ञानमाला भजनपाखें भजन हालेगु ज्या नं जूगु खः ।

उगु परित्राणया व्यवस्थापन संजिवकाजी (कान्छा) तुलाधर व सविना तुलाधरं यानादीगु खः । वि.सं. २००८ सालय् पलिस्था जूगु निर्वाणमूर्ति विहार नेपाःया थेरवादी गुरुमांपिनिगु न्हापांगु विहार खः । थ्व विहार धर्मचारी गुरुमांनं पलिस्था यानाबिज्याःगु खः ।

धर्मचारी गुरुमां नेपालय् थेरवादी बुद्धशासन धिसिलाकेत मिसापिनि ख्यलं योगदान बियाबिज्याःम्ह न्हापां अनगारिका खः । नेपालभाषा साहित्य् वसपोलं लक्ष्मीनानी उपासिकाया नामं काव्य रचना नं यानादीगु दु ।