नेपालय् बंगलादेशी पीडित अझ पीडित जुइमाःगु द्वपं

येँ – नेपालय् दुर्घटनाग्रस्त जूगु बंगलादेशया विमानय् लानाः मदुपिनि छेँजःपिंत नेपाः सरकारं माक्व ग्वहालि मयाःगु खँ बंगलादेशया सञ्चार माध्यमतय्सं च्वया हःगु दु ।

विमान दुर्घटनाय् जुइवं उकी लानाः घाःपाः जूपिंत एम्बुलेन्सय् तयाः अस्पतालय् तये धुंकाः वयां लिपा पीडितयात वास्ता तकं मयाःगु खँ उमिसं च्वया हःगु दु ।
अस्पतालय् भर्ना याना तःपिं थः–थितिपिं तकं नापलाके मबिसे पना तःगु गुनासो नं बंगलादेशी पीडिततय्सं धाःगु दु । सु विरामीया अवस्था छु जुयाच्वन व सीपिनि स्थिति छु दु धकाः नं थःपिंत छुं हे जानकारी मबिउगु गुनासो नं उमिसं याःगु दु ।

बंगलादेशं पिहां वइगु ‘डेली स्टार’ पत्रिकाय् च्वयाहः कथं थःथितिपिं मंत धकाः नेपाः ब्वाँय् वःपिं बंगलादेशी थःथितिपिं नेपालय् अलपत्रय् लानाच्वंगु दु । नेपालय् सुयात गन वनाः छु धायेगु तकं मसियाः उमिगु बिजोग जूगु खँ उकी च्वया हःगु दु । लुमंकेबहः जू, थ्व स्वयां न्ह्यः बंगलादेशं उगु विमान दुर्घटना जूगुया लिउने थःपिनि ल्हाः मदु धकाः नेपाःयात पाः याना हःगु खः ।