न्हूसतकय् प्रहरी शक्ति विरुद्ध स्थानीय जनताया प्रतिरोध
येँ (नेपालभाषा टाइम्स)÷येँ महानगरपालिकां थनया २२ वडाय् लाःगु न्हूसतकय् स्थानीय जनताया विरोध दयेक दयेकं जबर्जस्ती फुटपाथ तब्या यायेगु कुतः याःगु दु । मनपाया थ्व प्रवृत्तिया विरोध यासें म्हिगः स्थानीय वडावासीतय्सं सतकय् वयाः प्रदर्शन याःगु खःसा उकियात दमन यायेगु लागिं मनपां सलंसःम्ह नगर प्रहरी तैनाथ याये हःगु खः । प्रदर्शन यानाच्वंपिं स्थानीय जनता व नगर प्रहरी दथुइ भिडन्त जुइगु सम्भावना खने दयेवं अन जनपद प्रहरीया थप शक्ति तैनाथ याये हःगु खः ।
मनपां २४ वडाय् लाःगु वंघः लागाय् सतक चिब्या यायेधुंकाःलि म्हिगः २२ वडाय् नं सतक चिब्या यायेगु कुतः यायेवं स्थानीय जनता सतकय् कुहां वःगु खः । उमिसं अन हयातःगु डोजरयात पनाः सतक चिब्या यायेगु सवालय् स्थानीय जनतालिसे सहलह यायेमाः धकाः माग याःगु खः । तर मनपाया मेयर बालेन साहं धाःसा स्थानीय जनतालिसे सहलह यायेगु पलेसा प्रहरी हयाः दमन याना छ्वयेगु नीति काःगु खँ धाःगु दु ।
अभियन्तातय्सं येँया जनतां पुला तःगु करं लहिनातःपिं नगर प्रहरीयात थौं येँया हे जनतायात दमन यायेगु ज्याय् छ्यलाच्वन धकाः नं कडा रुपं प्रतिरोध याःगु खः । पेटी तब्या यायेगु बारे स्थानीय जनताया धापू तयेगु धकाः २२ वडाया अध्यक्ष चिनिकाजी महर्जनं मेयर साहयात तःक्वःमछि फोन यातं नं मेयरं फोन मल्ह्वंगु खः ।
मनपाया थ्व योजना विरुद्ध म्हिगः वडा अध्यक्ष महर्जन नं सतक संघर्षय् कुहां वःगु खः । म्हिगःया प्रदर्शनय् नेपाली कांग्रेस व एमालेया स्थानीय राजनीतिक न्ह्यलुवातय्सं नं ब्वति काः वःगु खः । विरोध प्रदर्शनया झ्वलय् न्हूसतकय् मेयर साहया सल्लाहकार सुनिल लम्साल नं वयाच्वंगु दु धइगु हल्ला जुइवं लम्साललिसे जूसां वार्ता यायेगु धकाः माग याःगु खः तर लम्साल तकं वार्ताय् मवः । न्हूसतकय् पेटी तब्या यायेगु थ्व योजनाया डिजाइनर लम्साल हे खः धाःगु दु ।
मनपां स्थानीय जनतायात पेले हे यानाः न्ह्याः वनेगु नीति ज्वंगु जुयाः अन वडा अध्यक्ष लगायत स्थानीयत म्हिगः चछि हे धर्ना च्वंगु खः ।
‘अदालतं पेले यानाः ज्या या धाःगु मदु’
उच्च अदालतं मनपाया ज्या पने मते धकाः सडक विभागयात आदेश बीवं मनपां थ्व ज्या न्ह्याकूगु खः । तर स्थानीय गौतम डंगोलं धाःसा उच्च अदालतं थ्व सतकय् मनपां ज्या याये दइ लाकि मदइ धकाः जक आदेश बिउगु खः, तर अन अज्याःगु ज्या यायेगु आवश्यक खः लाकि मखु धकाः निर्णय यायेगु ज्या ला मनपां स्थानीय जनतालिसे सहलह यानाः यायेमाःगु खँ कनादीगु दु । मनपाया अधिकार क्षेत्रय् लाःगु धायेवं तुं जनतायात पेले यानाः छुं नं ज्या याये मदइगु दावी नं वय्कलं यानादिल ।
वय्कलं धयादिल, ‘मनपाया नगर परिषद् बैठकय् न्हूसतकय् आःयात छुं याये मखु धकाः मेयरं बचं बियादीगु खः । तर आः उकिया पालना याःगु ग्व ?’
LEAVE YOUR COMMENTS