ने. सं. ११४४ कौलाथ्व पारू - नःलास्वनेगु

सहकारी नियमनया निंतिं विशिष्टिकृत नियामक निकाय

येँ (नेपालभाषा टाइम्स)- सहकारी संस्थाया सुपरीवेक्षण व नियमन यायेगु निंतिं सरकारं विशिष्टिकृत नियामक निकाय नीस्वनीगु जूगु दु । म्हिगः सरकारया नीति तथा कार्यक्रम न्ह्यब्वसें राष्ट्रपति रामचन्द्र पौडेलं थुकिया जानकारी बियादीगु खः । सहकारी संस्थाया सघन सुपरीवेक्षण व नियमनया नितिं विशिष्टिकृत नियामक निकाय स्थापन यायेगु घोषणा वय्कलं यानादीगु खः ।

सहकारी बचत तथा कर्जा सुरक्षण कोष, सहकारी कर्जा सूचना केन्द्र व सहकारी कर्जा असुली न्यायाधिकरणपाखें सहकारी क्षेत्रया बचत तथा लगानीया सुरक्षा यायेगु सरकारया नीति दु । उकथं हे सहकारी संस्थात अनिवार्य रुपय् सहकारी तथा गरिबी सम्बन्धी व्यवस्थापन, सूचना प्रणालीइ आवद्ध जुइमाःगु व्यवस्था यायेमाःगु नं सरकारया नीति व कार्यक्रमय् दुथ्याकातःगु दु ।

सरकारया शेयर स्वामित्व दुगु साझा सहकारी संस्थायात एकीकरण यायेगु व्यवस्था याइगु जूगु दुसा बचत तथा ऋण सहकारीयात छगूलिसे मेगु मर्ज यायेगु ज्यायात प्रोत्साहित यायेगु नीति नं सरकारं काःगु दु ।

सरकारया नीति तथा कार्यक्रमय् स्थानीय तह व निजी क्षेत्रया सहकार्यय् येँया उत्तरी क्षेत्रय् न्हूगु शहर दयेकेगु योजना दु । थ्व वृहत्तर गुरुयोजनाया प्रभावकारी कार्यान्वयन यायेगु खँ नं नीति तथा कार्यक्रमय् न्ह्यथनातःगु दु ।

उकथं हे न्हूगु दयेकेत्यंगु शहरयात प्राथमिकीकरण यानाः स्वंगू शहरयात नमूना स्मार्ट शहरया रुपय् विकास यायेगु ज्याझ्वः घोषणा याःगु दु । क्लस्टर सिटीया अवधारणय् लुम्बिनी, पोखरा व जनकपुरय् एकीकृत शहरी पूर्वाधार दयेकीगु जूगु दु ।