महानगरया करया दायरा अप्वयेकेत व्यवसायीतय्सं ग्वाहालि याइगु

येँ- येँ महानगरपालिकायात करया दायरा अप्वयेकेत व्यवसायीतय्सं ग्वाहालि याइगु जूगु दु । छुं दिं न्ह्यः येँ महानगरपालिका राजस्व परामर्श समितिया बैठकय् सहभागि व्यवसायीतय्सं करया दायरा अप्वयेकेत ग्वाहालि यायेगु धयादीगु खः ।

येँ महानगरपालिकाया आर्थिक दँ ०७८÷७९या वार्षिक बजेट व नीति तथा कार्यक्रम तयारीया सन्दर्भय् समितिया संयोजकलिसें येँ महानगरपालिकाया उपप्रमुख हरिप्रभा खड्गी श्रेष्ठया अध्यक्षताय् च्वंगु बैठकय् सहभागि व्यवसायीतय्सं संघ व महासंघपाखें करया दायरा अप्वयेकेत ग्वाहालि यायेगु खँ धयादीगु खः ।

बैठकय् नवानादिसें समितिया संयोजकलिसें उपप्रमुख खड्गी श्रेष्ठं व्यवसायीतय् ग्वाहालिपाखें हे येँ महानगरं राजस्व संकलनया लक्ष्य प्राप्त यायेफइ धासें थुकी थःथःगु थासं भूमिका म्हितेत इनाप यानादिल ।
वय्कलं महागरया समृद्धिया निंतिं व्यवसायीतय् नं साथ कयाः वनेगु थःपिनिगु सोच खः धासें वय्कलं आःया विषम परिस्थितिइ राजस्या दरय् स्वयां थःपिनिगु दृष्टि दायराय् केन्द्रीत जुयाच्वंगु दु धयादिल ।
विभागया प्रमुख डा शिवराज अधिकारीं महानगर दुनेया व्यवसाययात करिब स्वसः ताजि स्वयां अप्वलय् वर्गीकरण यानाः व्यवसाय कर लगे यायेत प्रस्ताव तयार यानागु जानकारी बियादिल । वय्कलं थीथीकथंया व्यवसाय याना वयाच्वंपिं करिब पीगू संघ महासंघलिसे नियमित रुपं सहलह व परामर्श यानाः प्रस्ताव तयार यानागु नं बैठकय् जानकारी बियादीगु खः ।

बैठकय् मुख्य यानाः महानगर दुनेया वस्तुगत व सेवागत व्यवसाय संचालन, संचालकया मनोविज्ञान, व्यवसाय दर्ता व नवीकरण प्रक्रिया लगायत सम्बन्धित विषयवस्तुइ केन्द्रीत जुयाः सहलह याःगु खः ।
येँ महानगर उपप्रमुख खड्गी श्रेष्ठया संयोजकत्वय् गठन यानातःगु समितिइ विभागया प्रमुख डा. अधिकारी सदस्य सचिवया रुपय् च्वनादीगु दुसा दुजलय् प्रमुख प्रशासकीय अधिकृत राजेश्वर ज्ञवाली, ३२ नं. वडाअध्यक्ष नवराज पराजुली, कार्यपालिकाया दुजः कान्ता गौतम, नेपाल उद्योग वाणिज्य महासंघया प्रतिनिधि संदिप अग्रवाल, घरेलु उद्योग संघया प्रतिनिधि पदमकुमारी कार्की च्वनादीगु दु ।