मर्कन्टाइलया सर्भरय् नं ह्याकरया पहुँच

येँ – वंगु निगू दशक निसें मर्कन्टाइल कम्युनिकेसन प्रालिं व्यवस्थापन यानाच्वंगु एनपी डोमेनय् ह्याकरतय्सं थःगु पहुँच दयेकेत ताः लाःगु दु ।

मर्कन्टाइलं थःगु एनपी डोमेनया सर्भरय् ह्याकरतय्सं पहुँच दयेकूगु खँ धाःगु दु । मर्कन्टाइलं छगू विज्ञप्ति पिथंसें सोमवाः बहनी १०ः३७ बजे थःपिनिगु सर्भरया सुरक्षा प्रणाली उलंघन जूगु खँ धाःगु दु । ह्याकरय्सं पहुँच दयेकूगु सर्भरय् थप सुरक्षा प्रणाली लागु यायेगु तयारी जुयाच्वंगु खँ नं मर्कन्टाइलं न्ह्यथंगु दु । कम्पनीं सर्भरया सेक्युरिटी ह्याक यायेत स्वःपिं ह्याकरयात छुं नं कथंया डाटा प्राप्त यायेधुंकूगु खःसा सार्वजनिक मयायेत व सिस्टमय् क्षति मयायेत इनाप याःगु दु ।

सुरक्षा प्रणाली उलंघन बारे प्रारम्भिक अध्ययन यानाच्वंगु न्ह्यथंसें मर्कन्टाइलं आः उपलब्ध एनपी डोमेनया छुं नं कथंया समस्या मदुगु खँ धाःगु दु । आःया निंतिं मर्कन्टाइलं एनपी डोमेन दर्ता प्रक्रिया बन्द यानागु खँ नं विज्ञप्ति मार्फत न्ह्यथंगु दु ।

मर्कन्टाइलं वंगु २५दँ निसें ८३ हजार व्यक्तिगत व व्यावसायीक कम्पनीयात एनपी डोमेनया निःशुल्क सेवा उपलब्ध याकावयाच्वंगु दु ।