अर्जेन्टिनायात महत्वपूर्ण अंक

कप्तान लियोनल मेसीया पेनाल्टि गोलं अर्जेन्टिनां कोपा अमेरिकाय् महत्वपूर्ण १ अंक कायेत ताःलाःगु दु । म्हिगः सुथय् जूगु कासाय् पराग्वे लिसे छगू छगू गोलया बराबरी जुइवं अर्जेन्टिनां १ अंकं चित्त बुझे यायेमाःगु खः । कासाया न्हापांगु हाफया ३७ औं मिनेटय् रिचार्ड साञ्चेजं गोलं यासें पाराग्वेयात अग्रता बीधुंकूगु खः ।

छगू गोलं लिउने लाःगु अर्जेन्टिनाया निंतिं मेसीं ५७ औं मिनेटय् पेनाल्टिपाखें गोल याःगु खः । थ्व बराबरी लिपा अर्जेन्टिना निगू कासा म्हितेधुंकाः समूह बी १ अंक कयाः दकलय् लिउने दु ।‘जिपिं भाग्यमानी जूगु दु, छाय्धाःसां जिपिं अझं धेंधेंबल्लाखय् ल्यनिगु सम्भावना पिहां वःगु दु’ प्रशिक्षक लियोनल स्कालोनीं धाःगु दु ।

अर्जेन्टिनां वइगु आइतवाः कतारलिसे लिग चरणया अन्तिम कासा म्हिती ।‘न्हापांगु हाफ जिमिगु ला बांमलात । जिमिसं तसकं निराशापूर्ण कासा म्हिता । न त कासा नियन्त्रणय् दत, न आक्रमण हे यायेफत । जिमिके त्याकेगु स्पष्ट योजना दुगु खः, तर उकियात कार्यान्वयन यायेमफुत’ प्रशिक्षक स्कालोनीं धाःगु दु ।

मेसीं बराबरी गोल याःगु छगू मिनेट लिपा हे पाराग्वेयात नं पेनाल्टिया ह्वःताः वःगु खः । तर डेर्लिज गोञ्जालेजया प्रहारयात अर्जेन्टिनी किपर फ्रान्को अर्मानीं पञ्च यानाबिल । किपर फ्रान्को गोञ्जालेजयात हे न्हापांगु हाफया अन्तपाखे फल तःगुलिं ह्याउँगु कार्ड नयेगु पाखें बचे जूम्ह खः । ‘जिमित फ्रान्को प्रति विश्वास दु ।

व जिमि टिमया सुरुं निसेंया गोलकिपर खः । वं पेनाल्टि बचे यानाः जीवनदान बिउगु दु । वयागु प्रदर्शनप्रति गर्व दु’ स्कालोनीं धाःगु दु ।
शनिवाःया न्हापांगु कासाय् कोलम्बियापाखें पराजित अर्जेन्टिनायात धेंधेंबल्लाखय् च्वनाच्वनेगु निंतिं आइतवाः कतार लिसे जुइगु कासा त्याके हे माःगु दु ।

मेखे कोलम्बियां कतारयात १–० गोलं बुकाः समूह बी शीर्षस्थानय् कब्जा याःगु दु । कतारलिसे बराबरी म्हितूगु पाराग्वे २ अंक सहित निगूगु थासय् दु । मेगु कासाय् कोलम्बियायात पराजित यायेफत धाःसा पाराग्वे तप्यंक क्वार्टरफाइनलय् दुहां वनीगु जुइ ।