निजीया विद्यार्थीत सरकारी स्कुलपाखे आकर्षित

येँ –

दरवार हाइस्कुल पुनर्निर्माणया क्वचायेवं अन भर्ना जुइपिं विद्यार्थीत अप्वया वनाच्वंगु दुसा मेखे निजी क्षेत्रया स्कुलया विद्यार्थी धाःसा म्हो जुयाच्वंगु खँ निजी विद्यालय सञ्चालकतय्सं धाःगु दु । येँया पुलांगु वस्तीइ च्वंगु निजी स्कुलया विद्यार्थीत थौंकन्हय् धमाधम दरवार हाइस्कुलय् भर्ना जुयाच्वंगु खँ नं उमिसं धाःगु दु ।

कोरोना संक्रमणया कारणं निजी स्कुलय् फि पुलेत तकं थाकुगुलिं विद्यार्थीत धमाधम सरकारी स्कुलय् वनेगु क्रम अप्वया वनाच्वंगु खँ धाःगु दु । थःगु नां कने मयःम्ह छगू निजी स्कुलया सञ्चालकं थःगु स्कुलया २० प्रतिशत स्वयां अप्वः विद्यार्थीत सरकारी विद्यालयय् वंगु खँ कनादिल ।

सरकारी स्कुलय् थगुनेया फि पुले मफुपिं आपालं मस्त सरकारी स्कुलय् वंगु खःसा दरवार हाइस्कुल पुनर्निर्माण जुइधुंकाः अनया भौतिक पूर्वाधार बांलाःगु कारणं नं आपालं विद्यार्थीत अन ब्वं वंगु खँ नं धाःगु दु ।

उकथं हे ढल्को क्षेत्रया हे छगू स्कुलया सञ्चालकं कनादीकथं यदि येँया कोर एरियाय् च्वंगु सामुदायिक स्कुलया पूर्वाधार बांलाना वन धाःसा निजी स्कुलत या त मर्जय् वनेमाली, या त बन्द यायेमालीगु अवस्था दु । वय्कलं कनादीकथं क्षत्रपाटीइ च्वंगु कन्यामन्दिर स्कुल पुनर्निर्माण सम्पन्न जुल धाःसा निजी स्कुलयात आपालं विद्यार्थीत अन नं वनीगु सम्भावना दु । थुकिं नं निजी स्कुलतय्त मर्का जुइगु सम्भावना दु ।

नांजाःगु ज्ञानोदय स्कुलय् नं छगू इलय् विद्यार्थी तसकं म्हो जुइधुंकूगु खः तर आः अनया प्रधानाध्यापकया अथक कुतलं यानाः स्कुलय् विद्यार्थी जक प्यद्वः स्वयां अप्वः थ्यनेधुंकल । अन थौंकन्हय् गुंगू तगिंनिसें सिभिल इन्जिनियर व कम्प्युटर इन्जिनियर समेत ब्वंकूगुलिं विद्यार्थी चाप अप्वया वनाच्वंगु खः ।’

अथे हे थौंकन्हय् येँया आपालं सरकारी स्कुलतय्सं थःपिनिगु स्तरोन्नति यासें विद्यार्थीतय्त आकर्षित यानाच्वंगु दु । तर मध्यमस्तरया स्कुलतय्सं धाःसा स्तरोन्नति याये फयाच्वंगु मदु । उमिसं पूर्वाधार तयार याये मफुगुया कारण सरकारं निजी स्कुलयात छुं नं कथंया सहुलियत बियातःगु मदु, निजी स्कुल धाल कि ध्यबा कमे यायेगु व्यवसाय खः धइकथं जक कायेगु यानाच्वंगु दु, थुकिं यानाः ज्या न्ह्याके मफुगु खः धइगु उमिगु तर्क दु ।

आपालं स्कुल सञ्चालकतय्सं सरकारी स्कुल स्तरीय जुया वनाच्वंगुलिं थःपिनिगु विरोध मदुसां नं सरकारं निजी स्कुलयात स्वइगु दृष्टिकोणय् धाःसा थःपिनिगु विरोध दुगु खँ कनेगु यानाच्वंगु दु । वय्कःपिनि धापू कथं लोक सेवा आयोगय् प्रतिस्पर्धा यायेगु झ्वलय् सरकारी स्कुलं ब्वनावःपिं विद्यार्थीयात सुविधा बीगु यानाच्वंगु दुसा निजी क्षेत्र वंपिं विद्यार्थीयात अज्याःगु सुविधा बियाच्वंगु मदु ।

सम्बन्धित बुखँ

LEAVE YOUR COMMENTS