सुचना विधेयक विरुद्ध अदालत वनेगु ख्याच्वः

येँ -पत्रकार महासंघया अध्यक्ष गोविन्द आचार्यं सूचना प्रविधि विधेयकया विरुद्ध अदालत वनेगु ख्याच्वः बिउगु दु । विधयेकया छुं बुँदाय् मौलिक हक सम्बन्धी व्यवस्थायात कटौती यानाः कठपुतली अदालत नीस्वनेत स्वःगु धासें उकिया विरुद्ध अदालत वनेगु ख्याच्वः बिउगु खः ।

सूचना प्रविधि विधेयक व प्रेस तथा अभिव्यक्ति स्वतन्त्रताया रक्षा विषयय् जूगु अन्र्तक्रिया ज्याझ्वलय् आचार्यं सजाय थप जूगु व्यवस्थायात कयाः आपत्ति प्वंकादीगु खः । उगु विधेयकया विरोधय् न्हय्गुलिं सदनय् इनाप यायेगु व सडक आन्दोलन यायेगु खँ नं धाःगु दु । दछि स्वयां अप्वः फौजदारी सजाय जुइगु खँय् अर्धन्यायीक निकाययात संविधानं अधिकार मबिउगु धासें सरकारं हयेत्यंगु न्हूगु विधेयकं संविधानया गम्भीर उल्लंघन जूगु खँ नं वय्कलं धयादीगु दु ।

मेखे सत्तारुढ दलया हे प्रेस संगठन नेपालया संयोजक महेश्वर दाहालं तत्कालीन प्रधानमन्त्री गिरिजाप्रसाद कोइरालां नं सञ्चारख्यःयात नियन्त्रण यायेत स्वःगु व आः हाकनं केपी ओली शर्मां नं उकियात हे निरन्तरता बीत स्वःगु धासें राज्य संयन्त्र न्ह्याबलें नियन्त्रणमुखी जूगु द्वपं बियादीगु दु । नेपाल प्रेस युनियनया अध्यक्ष बद्री सिग्देलं आः सरकारं हःगु विधेयक पत्रकारयात जक मखुसें आम नागरिकया मौलिक हक कुण्ठित जुइगु खँ धयादिल ।

सम्बन्धित बुखँ

LEAVE YOUR COMMENTS