राष्ट्रिय परिचयपत्र वितरण शुरु
येँ(नेपालभाषा टाइम्स)- येँ महानगरपालिकाया दक्वं वडापाखें राष्ट्रिय परिचयपत्रया निंतिं विवरण संकलन शुरु जूगु दु । थ्व स्वयां न्ह्यः गुंगू वडाय् जक राष्ट्रिय परिचयपत्रया निंतिं विवरण संकलन याःगु खः ।
येँ महानगरपालिकां थ्व स्वयां न्ह्यः वंगु माघ १५ गतेनिसें २४, २५, २६, २७, २८, २९, ३०, ३१ व ३२ य् जक उकथंया विवरण संकलन याःगु खःसा आः वयाः ३२ गुलिं वडाय् राष्ट्रिय परिचयपत्रया निंतिं विवरण संकलन यायेगु ज्यायात विस्तार याःगु खः ।
येँ महानगरपालिकाया प्रवक्ता नविन मानन्धरं माघ १० गतेनिसें हे दक्वं वडाय् राष्ट्रिय परिचयपत्र वितरण शुरु यायेगु धाःसां प्राविधिक ज्या ल्यं दुुगुलिं पञ्जीकरण विभागलिसे सहलह यानाः थुगु सेवा वंगु सोमवाःनिसें शुरु यानागु जानकारी बियादीगु दु । सेवा शुरु जुइधुंकाः आः नागरिकं थःत पायक जुइगु वडा ज्याकुथिइ वनाः राष्ट्रिय परिचयपत्रया निंतिं विवरण बी फइगु नं वय्कलं कनादीगु दु ।
क्वःछिनातःगु छुं छुं थासं जक विवरण संकलन यायेगु ज्यां अति आवश्यक जूपिंसं तकं इलय् राष्ट्रिय परिचयपत्र काये मफुगु धइगु गुनासो वयाच्वंगुलिं आः महानगरया दक्वं वडाय् सेवा विस्तार यानागु व थःत पायक जूगु थासय् वनाः परिचय पत्र कायेत वने फइगु व्यवस्था यानागु नं प्रवक्ता मानन्धरं कनादिल ।
कानूनी रुपं १६ दँ पुलेधुंकूपिं नेपाःमिं नागरिकता प्रमाणपत्र कयाः राष्ट्रिय परिचयपत्र काये फइगु व्यवस्था यानातःगु दु । राष्ट्रिय परिचयपत्र तथा पञ्जीकरण ऐन, २०७६, कार्यविधि २०७७ कथं वैयक्तिक व जैविक विवरण सहितया राष्ट्रिय परिचयपत्रया विवरणय् दुथ्याकातःगु दइ ।
राष्ट्रिय परिचयपत्र कायेत विवरण बि वनेगु इलय् नेपाली नागरिकाता प्रमाणपत्रया सक्कल प्रति, नागरिकता मदुगु हकय् शैक्षिक प्रमाणपत्र, राहदानी वा जन्म मिति खुले जुइगु सरकारी भ्वं अनिवार्य जुइ ।
अथे हे नागरिकता प्रमाणपत्रय् उल्लेख जुयाच्वंगु स्वयां फरक स्थायी ठेगाना जूसा बसाइँसराइँया सक्कल दर्ता, निम्ह तिपूया हकय् विवाह दर्ता, कलाः व भाःत मदयेधुंकूगु खःसा मृत्य दर्ताया सकल प्रमाणपत्र अनिवार्य यानातःगु दु ।
LEAVE YOUR COMMENTS