कवि नातिवज्रयात लुमंकल
येँ(नेपालभाषा टाइम्स)÷नेपालभाषाया साहित्य व सफू ह्यमिपिनिगु निंतिं नांजाःगु असनय् च्वंगु नातिवज्र सफू धुकूया थुवाःलिसें कवि नाति वज्रयात लुमंकूगु दु । कवि नाति वज्रया चय्खुक्वःगु बुन्हिया लसताय् भर्चुअल माध्यमं ज्याझ्वःयासें वय्कःया लुमंकूगु खः ।
कवि नाति वज्रया जहान प्रमिला वज्राचार्यपाखें वय्कःया किपाय् स्वां देछासे न्ह्याःगु ज्याझ्वलय् लोककवि राजभाई जकःमिं कवि नाति वज्रया योगदान कयाः कुलादिसें वय्कः जीवनीया लिधंसाय् च्वयादीगु चिनाखँ न्यंकादीगु खः ।
थुकथंया च्वमिलिसें भाषाह्यमि शान्तराज शाक्यं नाति वज्रं थःगु जीवंकाःछि न्ह्याकादीगु सफू धुूकूलिसें नाति वज्रया थीथी पक्षयात कयाः नुगःखँ तयादीगु खः । कवि नाति वज्रया आपालं म्येँय् लसय् हनादीम्ह नांजाःम्ह लय्चिनामि मनराजा नकःमिं वय्कःया म्येँया थीथी पक्षयात कयाः कुलादीगु खः ।
ज्याझ्वलय् च्वमि वसन्त महर्जन, डा. सुशील ताम्राकर, शाक्य सुरेन लगायतं नाति वज्रं भाषा साहित्य ख्यलय्् बियादीगु योगदानयात कयाः थःथःगु नुगःखँ तयादीगु खः । कवि नाति वज्रया तछलागा दशमिकुन्हु बुन्हि खःसा व कुन्हु हे हलिं नेवाः दबुलिं जूम अनलाइन प्रविधिया माध्यमंवय्कःया लुमन्तिइ उगु ज्याझ्वः याःगु खः ।
LEAVE YOUR COMMENTS