न्ह्योखा हाल अय्नं….या म्यूजिक भिडियो

येँ – जनकवि दुर्गालाल श्रेष्ठं खुइदँ न्ह्यः चिनातःगु म्येँया म्यूजिकि भिडिया पिहां वःगु दु । पाहाँचःह्रेबलय् हालीगु घातु म्येया लसय् चिनातःगु ‘न्ह्योखा हाल अय्नं..’ म्येँया म्युजिक भिडियोया प्रिमियर बुधवाः जनकवि श्रेष्ठं हे यानादिल ।

रामकृष्ण खड्गी निर्देशन यानादीगु थुगु म्यूजिक भिडियोय् वरिष्ठ कलाकार नगिना जोशी व अकलमान महर्जनं मू भूमिका म्हितातःगु दु । थ्व म्येँ नं वय्कःपिं निम्हेसिनं हे हालादीगु खः । ज्याझ्वलय् न्ववानादिसें जनकवि श्रेष्ठं खुइदँ न्ह्यः थःगु जीवनय् हे जूगु अनुभूति थुगु म्येँय् प्वंकागु खँ कनादिल । अथेहे वरिष्ठ कलाकार नगिना जोशीं पीच्यादँ न्ह्यः नं थःम्ह थुगु म्येँया गितिनाटकय् म्हितागु लुमंकुसें आः हाकनं थःगु हे सलय् म्येँ रेकर्ड यानाः म्यूजिक भिडियो म्हितेखंगु थःगु शौभाग्य जूगु खँ कनादिल । म्येँया म्यूजिक अरेन्ज जीवित महर्जनं यानादीगु खः ।

नगिना जोशी व विजयमान सिंहं निर्माण याःगु म्यूजिक भिडियोय् सरिता वज्राचार्य विजयमान, निल शाक्यपिंसं नं म्हितातःगु दु । समाजसेवी पवित्र वज्राचार्यया सभापतित्वय् जूगु ज्याझ्वलय् नेपाल संवत् राष्ट््िय न्हूदँ समारोह समितिया ११४२ या नायः निरञ्जन रत्न शाक्य, संगीतका न्ह्यू वज्राचार्य, वरिष्ठ सिने पत्रकार विजयरत्न असंबरे, वरिष्ठ गायक जुजुकाजी रंजित पाहाँ कथं झायादीगु खःसा ज्याझ्वलय् कलाकार व प्राविधिकपिंत खादां क्वखायेका सम्मान याःगु खः ।