नेवाः विद्यार्थीतय्त आईएलओ १६९ या सचेतनामूलक तालिम

येँ – नेवाः विद्यार्थी युनियनया ग्वसालय् नेवाः ब्वनामिपिंत लक्षित यानाः आइएलओ १६९ या बारे छगू सचेतनामूलक तालिम बीगु ज्या जुल । युनियनया ग्वसालय् व नेवाः देय् दबूया ग्वाहालिं रत्नराज्य लक्ष्मी क्याम्पसय् स्नातक तहय् अध्ययन यानाच्वंपिं ब्वँमिपिंत लक्षित यानाः उगु तालिम बिउगु खः ।

आदिवासी जनजातिया हक, अधिकारनापं सांस्कृतिक पहिचान, नेवाः व आदिवासी जनजातिया अस्तित्व बारे जानकारी बीगु ल्याखं ग्वसाः ग्वःगु उगु तालिमय् पत्रकार मीरा राजभण्डारी अमात्यं सहजीकरणया भूमिका म्हितादीगु खः । देय् दबूया ज्याकुथिइ जूगु तालिमय् क्याम्पसय् बी.ए. न्हापांगु, निगूगु स्वंगूगु दँय् नेपालभाषा विषय कयाः अध्ययन यानाच्वंपिं विद्यार्थीतय् सहभागिता दुगु खः । नेवाःतय् हक, अधिकार, अस्त्विया बारे जानकारी बीगुया लिसें वइगु दिनय्ु म्हितेमाःगु भूमिकाया बारे नं तालिम बीगु ज्या जूगु युनियनया नायः रिदेन महर्जनं जानकारी बियादिल । अथे हे तालिमय् सहभागि न्हापांगु दँय् अध्ययनरत विवेक श्रेष्ठ व मनहेरा महर्जनं नं तालिमया आवश्यकता व उपलब्धियात कयाः थःगु अनुभव न्यंकादीगु खः ।

आदिवासी जनजातिया भाषा, कला, संस्कृति, पहिचान न्हंकेगु कुतः जुयाच्वंगु इलय् थज्याःगु तालिम आवश्यक जूगु जक मखसे थुकियात व्यापक याना यंकेमाःगु खँय् सहभागितय्सं बः बिउगु दु ।