ने. सं. ११४४ ञलाथ्व दशमी -

थःपिंके न्यनेमाःगु नेवाःतय् माग

हानं हयेत्यंगु गुथि विधेयक विरुद्ध मन्त्रीयात ज्ञापन

येँ – सरकारं हानं हयेत्यंगु गुथि विधेयकयात कयाः ‘गुथि विधेयक विरुद्ध एकीकृत आन्दोलन’पाखें म्हिगः भूमिसुधार मन्त्री पद्मा अर्यालयात नापलानाः ज्ञापनपौ बिल ।

सरकारं आः हानं हयेगु धकाः तयारी यानाच्वंगु गुथि विधेयक सदनय् पेश याये न्ह्यः सरोकारवाला नेवाः समुदायलिसे संवाद यायेमाः, यदि न्हापा थें हे नेवाःतय् जात्रा पर्वय् लिच्वः लाइ कथं विधेयक पेश यात धाःसा थःपिं हानं आन्दोलनय् कुहां वये मालेफु धासें उगु ज्ञापनपौ बिउगु खः ।

ज्ञापनपौ लःल्हाना कासें मन्त्री अर्यालं सरकारं आः हयेत्यंगु विधेयक न्हापायागु हे खः तर उकिं निजी गुथियात धाःसा थी मखु धयादिल । निजी गुथिया बारे खँ ल्हायेत नेवाः समुदायलिसे खँ ल्हायेगु बचं नं वय्कलं बियादीगु खः । थ्वहे वइगु २३ गते सम्बद्ध नेवाः समुदायलिसे थुकिया बारे खँल्हाबल्हा यायेगु खँ नं वय्कलं कनादिल ।

सरकारं थनिं न्याला न्ह्यः भूमि व्यवस्था यायेगु नामय् हःगु विधेयकय् निजी गुथिया जग्गा समेत थःपिंसं दुकायेगु व्यवस्था यानातःगु खःसा उकिया विरोधय् स्वनिगःया नेवाःत सतकय् कुहां वयेवं सरकारं उगु विधेयक लित काःगु खः । आः हानं उगु विधेयक हयेगु धकाः तयारी यायेवं स्वनिगःया नेवाःत हानं सतर्क जुसें मन्त्रीयात ज्ञापन बिउगु खः ।

मन्त्रीयात लःल्हाःगु ज्ञापनपती आदिवासी जनजाति सम्बन्धी थीथी अन्तर्राष्ट्रिय कानून व सन्धिपाखें राज्यं आदिवासी जनजातियात लिच्वः लाइगु छुं नं कथंया ज्याखँ याये न्ह्यः सरोकारवाला समुदायया स्वीकृति कायेमाः धयातःगु कारणं सरकारं उकिया पालना यायेमाः धयातःगु दु ।

थःपिनि प्रथाजन्य ज्याखँ यायेत राज्यं छुं नं कथं पंगः थने मदइगु दावी नेवाःतय्सं यानाच्वंगु दु । ज्ञापन पौ बीत आन्दोलनया नायः डा. महेशमान श्रेष्ठ, जनकवि दुर्गालाल श्रेष्ठ, साहित्यकार हितकरवीर सिं कंसकार लगायत आन्दोलनय् सहभागी थीथी कार्यकर्तात झाःगु खः ।