ने. सं. ११४४ कौलाथ्व चौथी -

स्वनिगःयात सांस्कृतिक राजधानी दयेकेमाः

ख्वप(नेपालभाषा टाइम्स)- ख्वप नगरपालिकाया प्रमुख सुनिल प्रजापतिं विश्वया हे उत्कृष्ट सभ्यताया रुपय् दयाच्वंगु स्वनिगःयात सांस्कृतिक राजधानी दयेकेमाःगु खँ धयादीगु दु । स्वनिगःया भाषा, कला, संस्कृति, रहनसहन व सभ्यता विश्वया हे उत्कृष्ट दुगु जिकिर यासें वय्कलं थनया जनजीवन छगू जीवन्त संग्रहालयया रुपय् दुगु व थुकियात देय्या हे सांस्कृतिक राजधानी दयेकेमाःगु आवश्यक जू धयादिल ।

नगर प्रमुख प्रजापतिं उगु खँ ख्वप नगरपालिकाया ग्वसालय् जुइत्यंगु गुंला बाजं धेंधेंबल्लाः कासायात कयाः जूगु सांस्कृतिकर्मीतय् छगू भेलायात संबोधन यासें धयादीगु खः । लिपांगु इलय् स्वनिगलय् सांस्कृतिक अतिक्रमण अप्वया वनाच्वंगु खँय् चिउताः प्वंकादिसें वय्कलं धयादिल, ‘भाषा, कला, संस्कृति मंत धाःसा झीगु थःगु म्हसीका नं सिधया वनी ।’

ख्वप नगरपालिकां अप्वया वनाच्वंगु सांस्कृतिक अतिक्रमणयात चिउताः प्वंका च्वंगु धासें सांस्कृतिक पुनःजागरण हयेत नगरपालिकां कुतः यानाच्वंगु दु धयादिल । झी पुर्खा थःगु म्हसीका व चिंया रुपय् त्वःता थकूगु मौलिक, मूर्त व अमूर्त सम्पदाया संरक्षण, संवद्र्धन यायेगु नापं पुनःनिर्माण यानाः न्हू पुस्तायात सक्षम यायेमाः धयादिल ।

स्वनिगःया मौलिक सम्पदा विदेशी दातृ निकायपाखें दयेकेगु ज्यां अज्याःगु सम्पदाया मौलिकता छखे लाइगु खतरा दुगु कुलादिसें वय्कलं थुखपाखे न्हू पुस्ताया आकर्षण अप्वयेकेत ज्याझ्वःत हयेमाःगु खँय् नं बः बियादिल ।

गुंला बाजंप्रति न्हू पुस्ताया आकर्षण अप्वयेकेत हे थःपिंसं उकथंया धेंधेंबल्लाः कासा यायेत्यनागु वय्कःया धापू दु ।

नगरपालिकाया ग्वसालय् जुइगु गुंला बाजं धेंधेंबल्लाः कासाया बारे ख्वप नगरपालिका वडा नं. ९या वडाअध्यक्ष रविन्द्र ज्याख्वं जानकारी बियादीगु मुँज्याय् गुंला बाजं व्यवस्थापन तथा संरक्षण संघया नायः अमिरमान शाक्य, गुंला बाजं गुरुपिं त्रिरत्न मानन्धर, पुष्परत्न शाक्य, देवचन्द्र वज्राचार्य लगायतं नुगःखँ तयादीगु खः ।