रौतहटय् १०म्हेसित कोरोनाया संक्रमण, फुक्कं भारतं लिहांवःपिं

येँ – कोरोना भाइरसा (कोभिड–१९)पाखें नेपालय् हानं १०म्ह संक्रमित जूगु दु । आइतवाः सुथय् रौतहटय् १०म्हेसित संक्रमण जूगु पुष्टि स्वास्थ्य तथा जनसंख्या मन्त्रालयं याःगु दु । थ्व नपां नेपालय् संmत्रमित जूपिं २९१म्ह थ्यंगु दु ।

रौतहटय् राजपुर नगरपालिका फरहदा–९ छेँ जूपिं १८, ३२,, ३६, ३९, ३९, ४२ व ४८ दँया मिजंतय्त संक्रमण जूगु खः । अथेहे इशनाथ नगरपालिका ३ व ५ नम्बर वडाया २८, ३० व ३३दँया मिजंतय्त संक्रमण जूगु जानकारी मन्त्रालयं बिउगु दु । फुक्कं १०म्हेसितया कोरोना परीक्षण येँया राष्ट्रिय जनस्वास्थ्य प्रयोगशालाय् याःगु खः ।

आइतवाः संक्रमित जूपिं फुक्कं छुं ई न्ह्यः जक भारतया मुम्बई नं वःपिं खः । भारतं नेपाः लिहांवयेधुंकाः अनया स्थानीय क्वारेन्टाइनय् च्वनाच्वंपिं खः । क्वारेन्टाइनय् दुपिं उमिगु स्वाब शुक्रवाः संकलन याःगु खः । संक्रमितपिंत आः वासः याकेगु निंतिं वीरगञ्ज छ्वयेगु तयारी जुयाच्वंगु दु ।