युगकविया झ्वाता पलिस्था

येँ – नेपालभाषा व खस नेपाली भाय्या नांजाःम्ह युगकवि सिद्धिचरण श्रेष्ठया झ्वाता ओलखढुंगाय् पलिस्था याःगु दु । कवि श्रेष्ठया जन्म ओखलढुंगाय् हे जूगु खः । ओखलढुंगा जिल्लाय् कवि श्रेष्ठया नामं नगरपालिकाया हे नामाकरण जुयाच्वंगु दु । अनया सिद्धिचरण नगरपालिका वडा नं १२ य् वय्कः थ्व झ्वाता पलिस्था याःगु खः ।

वंगु वालय् राष्ट्रपति विद्यादेवी भण्डारीं छगू समारोहया दथुइ च्यागूत्या फिट दुगु उगु झ्वाताया उलेज्या यानादीगु खः । उगु हे थासय् सर्जक पार्क नं उलेज्या जूगु खः । उगु हे ज्याझ्वलय् आख्यानकार डा.ध्रुवचन्द्र गौतमयात छगू लाख तकाया सिद्धिचरण पुरस्कार लःल्हाःगु खःसा ओखलढुंगायाम्ह हे पत्रकार होमनाथ दाहालयात ४० द्वःया सिद्धिचरण पत्रकारिता सिरपाः लःल्हाःगु खः ।

अथे हे साहित्यकार सुवर्ण शाक्ययात सिद्धिचरण शताब्दी पुरस्कारं छाय्पिउगु खः । ज्याझ्वलय् सम्बोधन यासें राष्ट्रपति भण्डारीं युगकवि सिद्धिचरण श्रेष्ठया कवितां प्रकृति प्रेम व थःगु जन्मस्थल प्रतिया प्रेमयात यक्व अभिव्यक्त यानातःगु खँ कनादिल । लिसें सिद्धिचरणया कवितां साहित्यया छगू युगयात हे प्रेरित याःगु बिचाः नं तयादिल ।

ज्याझ्वलय् उपप्रधानमन्त्री इश्वर पोखरेल लिसें प्रदेश नं. १ या मुख्यमन्त्री शेरधन राई, सिद्धिचरण नगरपालिकाया मेयर मोहनकुमार श्रेष्ठ व युगकवि श्रेष्ठया कायभाजु रविचरण श्रेष्ठं नं नुगःखँ प्वंकादीगु खः । कवि श्रेष्ठया उगु झ्वाता येँया नांजाःम्ह मूर्तिकार बालकृष्ण तुलाधरं दयेकादीगु खः । कलाकार तुलाधरं थ्व स्वयां न्ह्यः मदन भण्डारी, पुष्पलाल श्रेष्ठ आदि आपालं नेतातय्गु नं झ्वाता दयेकादीधुंकूगु दु ।