सिफलय् धर्मभक्त माथेमाया पूर्णकदया शालिक उलेज्या

येँ – येँ महानगरपालिकां शहीद धर्मभक्त माथेमायात फाँसी बीगु थाय् सिफलय् वय्कःया पूर्णकदया सालिक तःगु दु। शहीद सप्ताहअन्तर्गत सोमवाः जूगु छगू ज्याझ्वःया दथुइ येँ महानगरपालिकाया मेयर विद्या सुन्दर शाक्यं शालिकया उलेज्या यानादीगु खः । थ्व शालिक कलाकार महेश तुलाधरं दयेकादीगु खः ।

ज्याझ्वलय् न्ववासें येँ महानगरपालिकाया मेयर शाक्यं आःतक चूलाःगु राजनीतिक उपलब्धी शहीदय् कारणं चूलाःगु खँ धयादिसें देय्या समृद्धि व विकासं जक वय्कःपिनि म्हगस पूवनीगु खँ धयादिल । ज्याझ्वलय् न्ववासें शिक्षाविद् केदारभक्त माथेमां कामपां पूर्ण कदलया सालिक तयाबिउगुलिं आः शहीदया बलिदान बारे न्हू पुस्तायात लुमंका बीफइगु खँ धयादिल ।

वि.सं. १९६६ आश्विन १ गते येँया ओमबहालय् बूम्ह माथेमायात तत्कालिन राणा शासन विरुद्ध जूगु द्वपं बिसें वि.सं. १९९७ माघ १३ गते सिफलया सीमा झुण्डे यानाः मृत्युदण्ड बिउगु खः । तत्कालीन प्रधानमन्त्री जुद्ध शम्शेरं १९९७ माघ ६ गते शुक्रराज शास्त्री, धर्मभक्त माथेमा, गंगालाल श्रेष्ठ व दशरथ चन्द्रयात मृत्युदण्ड बीगु निर्णय याःगु खः ।