बुंगद्यःया देगः दने सिमधयाः पाञ्जुपिं मछाल
यल – बुंगय् च्वंगु बुंगद्यःया देगः दनेगु ज्या हानं दिउगु दु । वंगु न्याला न्ह्यवंनिसें देगः दनेज्याय् अप्पा छपा हे तने मफुगु खँ बुंगद्यःया पाञ्जुपिंसं धयादीगु दु । थुगुसी बुंगद्यःया देगः दनेज्या दिउगुया कारण धाःसा थुकियात माःगु दाचि अप्पा मदयाः खः धाःगु दु । देगः दनेत नीस्वना तःगु उपभोक्ता समितिया नायः अमिर शाक्यं कनादीकथं आः देगःयात माःगु १४,००० पा दाचि अप्पा अझ हे दयेकाच्वंगु कारणं देगः दने मफयाच्वंगु खः । थ्व देगःया लागिं विशेष कथं अर्डर याना तयागु खँ वय्कलं कनादीगु दु ।
देगः दनेगु ज्या दिनाच्वंसां देगःयात माःगु झ्याः, त्वलं व सिँयागु मेमेगु ज्वलं सम्बन्धी ज्या धाःसा न्ह्यानाच्वंगु खँ नं शाक्यं कनादीगु दु । अप्वः धइथें दाचि अप्पाय् वँथं गये यःगुु जुयाः थन छ्यलीगु अप्पा अथे मजुइमा धकाः उकी रसायन तयाः दयेकेगु ज्या जुयाच्वंगु खँ नं धाःगु दु ।
बुंग लागाया हे तसकं नां जाःगु मनकामना माइ व ह्यग्रीव भैरवया देगः दने सिधयेधुंकाः नं बुंगद्यःया देगः धाःसा अझ नं दने सिमधःनिगु कारणं बुंगद्यःलिसे सम्बन्धित पाञ्जु लिसें स्थानीय मनूतय्त मछाःसे हे च्वना वःगु खँ नं पाञ्जुपिंसं कनादीगु दु । बुंगद्यः दर्शन याः वइपिं दर्शनार्थीतय्सं ध्यबा मदयाः दने सिमधःगु खः लाकि धकाः ध्यबा बीत समेत स्वइगु खँ नं वय्कःपिंसं कनादीगु दु ।
वि.सं. २०७२ सालया तःभुखाचय् थ्व देगः पाःताः जुइक दुना वंगु खः । देगः दनेत श्रीलंका सरकारं आर्थिक ग्वाहालि बीगु खँ धाःगु खःसां उकी सुनानं चिउताः मतयेवं उपभोक्ता समिति गठन यानाः पुरातत्व विभागपाखें देगः दनेगु ज्या न्ह्याकूगु खः । दने सिधयेकेत अझ मेगु निदँ ति ई कायेफुगु खँ धाःगु दु । थ्व देगः करिब १३०० दँ पुलां धइगु अनुमान दु । पुनर्निर्माणय् अन लुया वःगु १३०० निसें १४०० दँ पुलांगु मेथ समेत छ्यलाच्वंगु दु ।
LEAVE YOUR COMMENTS