येँ देय् भासे जुइगु संकेत !

जमिन तःले खाली जूथासं ग्याँस पिहां वयेगु शुरु

येँ (नेपालभाषा टाइम्स) – वंगु वालय् सामाजिक सञ्जालय् छगू भिडियो भाइरल जुल । उकी छखा छेँया नापसं जमिनं कुँत्याः थें पिहां वयाः च्वय् सर्गतय् थहां वनाच्वंगु खनेदु । व येँया सुकेधाराय् जमिनया क्वय् डीप बोरिङ यानाः लः लिकायेगु कुतः याःबलय् जमिनं छ्वम्र्हुया वःगु ग्याँस, फि व चाया लेदो जुयाच्वन । प्रत्यक्षदर्शीतय्सं धाः कथं उगु थासय् थज्याःगु लेदो करिब स्वघौ तक पिहां वयाच्वंगु खः गुगु सर्गतय् करिब ५० फिट तक थहां वंगु खः ।

येँया जमिन क्वय् अज्याःगु लेदो पिहां वःगुयात भूगर्भविद्तय्सं धाःसा बांमलाःगु संकेतया रूपय् काःगु दु । येँय् जमिनया क्वं लः लिकायेगु ज्या तीव्र रूपं न्ह्यानावंगु कारणं आः जमिन फ्वासाफ्वासां वनेगु क्रम शुरु खँ विज्ञतय्सं धाःगु दु। यदि थुकियात इलय् पने मफुत धाःसा येँ देय् गुगुं नं इलय् भासे जुया वने फइगु ख्याच्वः समेत विज्ञतय्सं बिउगु दु ।

विज्ञतय्सं धाः कथं जमिनया क्वं डीप बोरिङ यानाः लः लिकायेगु क्रम अप्वया वःगु कारणं थौंकन्हय् अथे लः लिकाइगु थासय् हानं लः वनाः जाइगु क्रम कम जुयाच्वंगु दु। गुकिं यानाः लः लिकायेवं खाली जुइगु जमिन तःले च्वंगु अज्याःगु थाय् थीथी कथंया ग्याँसपाखें भरे जुइगु जुयाच्वंगु दु । लिपा गनं डीप बोरिङ याइबलय् अनं लः पिहां वयेगु पलेसा अज्याःगु ग्याँस पिहां वइगु खः ।

जमिन तःलं लः लिकायेधुंकाः उकियात रिचार्ज मयाःगु कारणं थ्व समस्या वःगु खँ नं विज्ञतय्सं धाःगु दु । येँय् पिनें वयाः च्वनीपिं मनूतय् ल्याः अप्वया वंसां सरकारं लःया आपूर्ति याये मफुगु कारणं मनूतय्सं डीप बोरिङ यानाः लः पिकायेगु ज्या यानाच्वंगु दु । जमिनं लः लिकायेगु ज्या अप्वया वंगु कारणं येँया जमिन क्वय् खराब लिच्वः लायेगु शुरु जुइधुंकूगु खँ सुकेधाराया थ्व घटनां क्यंगु खँ नं विज्ञतय्सं धाःगु दु ।