ने. सं. ११४३ तछलाथ्व दशमी -

अन्ततः प्रदेश ३ या नां ‘बागमति’ तयेगु सर्वसम्मत निर्णय

येँ – अन्ततः प्रदेश नं. ३ या नां ‘बागमति’ प्रदेश हे तइगु जूगु दु। म्हिगः पृथ्वी जयन्तीया न्हि कुन्हु च्वंगु प्रदेश ३ या संसदीय बैठकं ‘बागमति प्रदेश’ नांयात सर्वसम्मत रुपं पारित याःगु खः । लिसें प्रदेश ३ या स्थायी राजधानी हेटौंडाय् तयेगु प्रस्तावयात नं पारित याःगु दु ।

प्रदेशया नां ‘बागमति’ तयेगु प्रस्तावय् संसदय् दुथ्याःगु सत्तापक्ष व विपक्ष सकलें पार्टीया सांसदत छप्पँ जूगु खः । संसदया कुल ११० म्ह सांसद मध्ये १०८ सांसदं बागमतिया पक्षय् मतदान याःगु खः । विपक्षय् छगू हे मत मलाः ।

प्रदेशया नां बागमति तयेगु प्रस्ताव विपक्षी नेपाली कांग्रेसया सचेतक इन्द्र बानियां तयादीगु खःसा उकियात सत्तापक्ष नेपाल कम्युनिष्ट पार्टीया सचेतक रामेश्वर फुयाँल लगायत विवेकशील पार्टीया रमेश पौडेल व शोभा शाक्य, राप्रपाया रीना माझी व राप्रपा संयुक्तया रीना गुरुङं समर्थन यानादीगु खः ।

अथे हे स्थायी राजधानी हेटौंडा तयेगु प्रस्ताव मुख्यमन्त्री डोरमणि पौडेलं दर्ता यानादीगु खःसा उकियात कांग्रेसया सचेतक इन्द्र बानिया लगायत राप्रपाया रीना माझी व राप्रपा संयुक्तया रीना गुरुबं समर्थन यानादीगु खः । विवेकशील पार्टीं धाःसा राजधानी धौख्यलय् तयेमाः धइगु मेगु हे प्रस्ताव दर्ता याःगु कारणं हेटौंडायात भोट मबिउ । लिसें विवेकशीलया प्रस्ताव नं बहुमतं असफल जुल ।

प्रदेशया नां बागमति तयेगु नेकपाया निर्णय प्रति नेकपाया पहिचानवादी सांसदतय्सं असन्तोष प्वंकूगु दु। तर निर्णय प्रति उपिं असन्तुष्ट जूसां थुकियात कयाः खुल्ला रुपं गनं व्यक्त धाःसा मयाः । प्रदेशया नां नेपाल मण्डल अथवा नेवाः-ताम्सालिब तयेमाः धकाः प्रस्ताव दर्ता यानातःगु खःसां सत्तारुढ दल नेपाल कम्युनिष्ट पार्टी ह्वीप जारी यासें पार्टीया निर्णय विरुद्ध सुयातं नं वने मबिउगु खः । थःपिंसं न्हापा दर्ता याना तयागु प्रस्तावय् मतदान जक जूसां याके बीमाः सांसदतय्सं तःगु मागयात नं पार्टीपाखें अस्वीकार याःगु खः । पार्टीया ह्वीप दुगु जुयाः बागमति प्रदेशया विरोधय् सुनां नं छुं न्ववायेगु अवसर तकं मदुगु खः ।

पहिचानवादीत घोर निराश
प्रदेश ३ या सांसदतय्सं सर्वसम्मत ढंगं ‘बागमति’ नां पारित याःगुलिं पहिचानवादी शक्तित निराश जूगु दु। प्रदेशया नां थ्व लागाया पहिचान पिलुइ कथं ‘नेपालमण्डल’ अथवा ‘नेवाः- ताम्सालिङ’ प्रदेश तयेमाः धकाः आन्दोलन याना वयाच्वंपिं नेवाः व तामाङ लगायत आदिवासी जनजाति शक्ति सकस्यां थ्व पलाःयात पहिचान विरोधी धकाः आक्रोश प्वंकूगु दु ।

सत्तारुढ दल नेकपां थ्व प्रस्ताव पारित याकेगु लागिं थः सांसदतय्त कडा ह्वीप लगे याःगु खः । पार्टीं बागमति नां तयेगु निर्णय यायेवं पार्टीया बछि धइथें सांसदतय्सं उकिया विरोध याःगु खःसां अन्तिमय् वयाः पार्टीं सुयातं उकिया विरोध न्ववाये तकं मफइगु ह्वीप लगे याःगु खः । पार्टी ह्वीपया कारणं सुं नं सांसदं उगु प्रस्तावया विपक्षय् वनेगु आँट मयाःगु खः ।

पहिचानवादी शक्तितय्सं थ्व नांयात स्वीकार याये फइ मखु धासें थुकिया विरुद्ध थःपिनि आन्दोलन जारी हे जुयाच्वनीगु खँ धाःगु दु ।

हेटौंडाय् दिपावली
प्रदेश नं. ३ या स्थायी राजधानी हेटौंडाय् तइगु सर्वसम्मत निर्णय जुइवं उकिया समर्थनय् म्हिगः हेटौंडाय् थाय्थासय् मत च्याकाः दिपावली न्यायेकूगु दु। हेटौंडाया बुद्ध चोक लगायत थीथी चोक व दुवातय् मत च्याकाः दिपावली याःगु खः । हेटौंडाया सकलें राजनीतिक पार्टी लगायत स्थानीय जनतां प्रदेशया थ्व निर्णययात लसकुस याःगु दु।

हेटौंडायात स्थायी राजधानी यायेमाः धकाः अनया राजनीतिक पार्टी, व्यापारिक समुदाय, बुद्धिजीवी व सर्वसाधारण जनतां ताः ई न्ह्यवंनिसें अभियान न्ह्याका वयाच्वंगु खः । प्रदेश सभापाखें हेटौंडाया पक्षय् निर्णय यायेवं थुकिया स्वतःस्फूर्त रुपं लसकुस यासें दिपावली यायेगु ज्या जूगु खः । लिसें म्हिगः प्रदेशया नामाकरणया सवालय् विरोध जुइफु धकाः हेटौंडाय् प्रदेश संसदया पिने कडा सुरक्षा बिउगु खः । अन म्हिगः सुं मनूत मुने तकं मबिउगु खः । लिसें नगरया चोक चोकय् नं सुरक्षाकर्मी पाः तयाः प्रदर्शन याके मबिउगु खः ।