विवादं यानाः तालमेलय् अलमल

येँ – सत्ता गठबन्धनं थौं तकया दुने महानगरपालिका व उपमहानगरपालिकाय् सिट बाँडफाँडया ज्या क्वचायेकीगु खँ धाःगु दु । म्हिगः जूगु सत्ता गठबन्धनया बैठकय् कांग्रेस सभापति शेरबहादुर देउवा, माओवादी अध्यक्ष पुष्पकमल दाहाल, नेकपा (एस) या अध्यक्ष माधव नेपाल लगायत शीर्ष नेतातय्सं थौं सिट बाँडफाँड क्वचायेकेगु निर्णय याःगु खः । म्हिगः गठबन्धनया स्थानीय तह निर्वाचन तयारी, परिचालन व अनुगमन समितिया बैठक च्वंगु खःसां छुं हे खँय् सहमति धाःसा जुइ मफुत ।

बैठक लिपा माओवादी नेता नारायणकाजी श्रेष्ठं सञ्चारकर्मीतलिसे खँ ल्हासें थौं महानगर व उपमहानगरया उम्मेदवारी क्वचायेकीगु खँ कनादिल । थौं हाकनं बैठक च्वनाः देय्न्यंकंया चुनावी तालमेलसम्बन्धी प्रतिवेदन स्वयाः जक मेगु निर्णय जुइगु खँ नं वय्कलं कनादिल ।

सत्ता गठबन्धनय् दुगु कांग्रेस, माओवादी, नेकपा एस, जसपा व राष्ट्रिय जनमोर्चा दथुइ चुनावी तालमेल यायेगु समझदारी जूगु खःसां स्थानीय स्तरय् धाःसा कार्यकर्ताया विरोधं यानाः समस्या जुयाच्वंगु दु ।

थ्वहे झ्वलय् गठबन्धनया संयन्त्रं स्थानीय तहया अवस्था व तालमेलया सम्भावना बारे सहलह यानाच्वंसां थीथी थासय् न्हापा थःपिं त्यानाच्वंगु थासय् आः नं थः हे त्याइ धासें मेपिंत सिट त्वःते फइ धकाः कार्यकर्तां विरोध यानाच्वंगु दु ।

उकथं हे गठबन्धन संयन्त्रं थौं तकया दुने तालमेल सम्बन्धी प्रतिवेदन छ्वयाहयेत निर्देशन बिउगु दु । थौंकन्हय् स्थानीय तह, जिल्ला व प्रदेश तहया संयन्त्रं गठबन्धन दुने सिट बाँडफाँडया आधार व मापदण्डयात कयाः सहलह यानाच्वंगु दु ।

बैशाख ३० गते जुइगु स्थानीय तहया निर्वाचनया नितिं निर्वाचन आयोगं १० व ११ गते उम्मेदवारी दर्ताया मिति क्वःछिनातःगु दुसा गठबन्धन दलं धाःसा आः तक नं सिट बाँडफाँड याये फयाच्वंगु मदुनि ।