माओवादी केन्द्र–नेसपा एकता वार्ता
येँ (नेपालभाषा टाइम्स)-नेपाल कम्युनिष्ट पार्टी (माओवादी केन्द्र) व नेपाल समाजवादी पार्टी (नेसपा) दथुइ पार्टी एकता जुल धाःसा पार्टीया नां ‘नेकपा (समाजवादी)’ तयेगु खँय् सकारात्मक सहलह जूगु दु । म्हिगः निगू पार्टीया वार्ता पुचः दथुइ जूगु सहलहय् नेकपा कायम हे यानाः लिउने ‘समाजवादी’ तयेगु खँय् सहमति जूगु खँ नेसपा वार्ता पुचःया संयोजक लिसे पार्टीया सहअध्यक्ष गंगानारायण श्रेष्ठं ‘नेपालभाषा टाइम्स’ कनादिल ।
वय्कलं वार्ता समितिं पार्टी एकता यायेगु नितिं एकता समायोजन समिति दयेकेत सुझाव बियागु धासें याकनं हे पार्टी एकताय् वने फइगु खँ कनादिल । वय्कःया कथं पार्टी एकता संयोजन समितिं पार्टीया वैचारिक व नीतिगत सुझाव, ध्वाँय् व नांयात कयाः माःगु सुझाव बीगु ज्या याइ ।
पार्टीया नां ‘नेकपा’ तयेगु खँय् नेसपाया अध्यक्ष डा. बाबुराम भट्टराई धाःसा सहमति मदुनि खः ला धइगु न्ह्यसःया लिसलयय् वय्कलं धयादिल, ‘नेकपा तयेगु वा मतयेगु धइगु थःथः बिचाः जुइफइ । पार्टी एकता समायोजन समितिं हे उकिया निर्णय याइ ।’
पार्टीया मेम्ह सहअध्यक्ष हिसिला यमिं म्हिगःया वार्ता टेक्निकल जक खः धासें राजनीतिक मुद्दायात कयाः थप सहलह यायेमानिगु खँ कनादिल । यमिं पार्टी एकताया नितिं थःपिंसं न्हापा बियागु गुंगू बुँदायात गुकथं सम्बोधन याइ व स्वये मानिगु खँ नं कनादिल ।
वय्कलं पार्टी एकता यायेगु बारे थ्वहे वइगु मंसिर ६ व ७ गते नेसपाया केन्द्रीय बैठकं सहलह याइ धासें थःपिनिगु मुद्दायात सम्बोधन मयासे पार्टी एकता जुइ फइगु सम्भावना मदुगु खँ स्पष्ट यानादिल । वय्कलं पार्टी एकताया नितिं बृहत समाजवादी धारयात माओवादी केन्द्रं नाली कि मनाली धइगु खँ मू मुद्दा जूगु धासें धयादिल, ‘मू खँ राजनीतिक मुद्दायात गुकथं न्ह्यःने यंकेगु धइगु खः ।’
माओवादी केन्द्रलिसे पार्टी एकता यायेगु निंतिं मेम्ह अध्यक्ष महेन्द्रराय यादव व सहअध्यक्ष गंगानारायण श्रेष्ठ हथाय् चायाच्वंगु दुसा डा. भट्टराई पक्ष धाःसा राजनीतिक मुद्दायात सम्बोधन मयायेकं एकता याये मजिउ धइगु पक्षय् दुगु खँ सीदुगु दु । थ्व स्वयां न्ह्यः डा. भट्टराईं माओवादी केन्द्रया अध्यक्ष पुष्पकमल दाहालयात शुक्रवाः नापलानाः भट्टराईं नेकपा तयेगु खँय् असहमति प्वंकादीगु खः ।
नेतृ यमिं मंसिर ६ व ७ गते माओवादीं बैठक तये मते धकाः इनाप याःसां नं नेसपाया केन्द्रीय समिति तयाः सहलह यायेत्यंगु खँ नं कनादिल ।
LEAVE YOUR COMMENTS