फोहरया गिरोहया कारणं समस्या

 

येँ(नेपालभाषा टाइम्स)- संस्कृति, पर्यटन तथा नागरिक उड्डयन मन्त्री जीवनराम श्रेष्ठं फोहर व्यवस्थापनया ज्याय् स्थानीय सरकारयात ग्वाहालि यायेत संघीय सरकार तयार दुगु खँ धयादीगु दु । फोहर व्यवस्थापनया खँ सामान्य जूसां फोहर दुनेया हे छथ्वः गिरोहं थुकियात तःधंगु समस्या दयेकाच्वंगु नं वय्कलं धयादिल ।
मन्त्री श्रेष्ठं उगु खँ थनया वंघलय् च्वंगु ऐतिहासिक वंघ दबूया उलेज्याझ्वलय् धयादीगु खः । वय्कलं फोहर दुनेया हे गिरोहं फोहर व्यवस्थापन याके मबियाच्वंगु दावी नं यानादीगु दु । फोहरयात स्रोतपाखें हे व्यवस्थापन यायेगुपाखे लगे जुइमाःगु खँय् बः बियादिसें मन्त्री श्रेष्ठं फोहर व्यवस्थापन यायेत स्थानीय सरकारयात संघीय सरकार ग्वाहालि यायेत नं तयार दुगु खँ धयादीगु खः ।

लिसें वय्कलं थुकथंया समस्या समाधान यायेगु नापं आः पर्यटन मन्त्रालयपाखें देगःत नं सुचुकुचु यायेगु ल्याखं राष्ट्रिय अभियान हे न्ह्याकेत्यनागु धयादीगु दु । वय्कलं थुकथंया सुचुकुचुया योजना सार्थक यायेत नापं थुकियात पूवंकेत संघ, प्रदेश व स्थानीय स्वंगुलिं तहया दथुइ सहयोगात्मक समन्वयया आवश्यक दुगु खँ धयादीगु दु । रात्रीकालीन पर्यटन व्यवसाय व्यवस्थित यायेत पर्यटकीयस्थल, देगः, सतः, फल्चा थेंज्याःगु सम्पदात बांलाकोःगु नापं उकियात सुरक्षित याना यंकेमाःगु खँय् नं वय्बलं बः बियादीगु दु ।

प्रदेश सरकारया आवश्यकता मदुगु व स्थानीय सरकारं नं बांलाक ज्या याये मफुगु धइगु चर्चा जुयाच्वंगु सन्भर्दय् मन्त्री श्रेष्ठं आतक नं गुलिखे नागरिकयात प्रदेश व स्थानीय सरकारया आवश्यकता व थ्व निकाय नं सशक्त जू धइगु खँ थुइके मफयाच्वंगु धयादीगु दु । सिंहदरवारय् जक लिकुनाच्वंगु गुलिखे अधिकार प्रदेश व स्थानीय सरकारय् वनेधुंकूसां थुकियात अनुभूति याये मफयाच्वंगुलिं अनावश्यक खँ वयाच्वंगु खः धासें आः नागरिकयात थुकिया बारे थुइकेमाःगु आवश्यक जू धयादिल ।

बागमति प्रदेशया आर्थिक मामिला व योजना मन्त्री शालिकराम जम्मकट्टेलं प्रदेश सरकारं विनियोजन यानातःगु ध्यबा खर्च याये मफयाः फ्रिज जुइगु अवस्था दुगु धासें विकास निर्माणया ज्याया निंतिं बजेट माग यायेत इनाप यानादिसें उकिया निंतिं मन्त्रालय बजेट बीत तयार दु धयादिल ।

विकासया ज्या ज्वनाः वइपिंत पार्टीया मिखां स्वये मजिउ धासें विकासया निंतिं ध्यबाया चिउताः मयायेत नं वय्कलं इनाप यानादिल । लिसें वय्कलं येँया विकास आः न्हूगु हे धंगं यायेमाःगु आवश्यक जूगु नं धयादीगु दु ।

सम्बन्धित बुखँ

LEAVE YOUR COMMENTS