राष्ट्रपतिं सर्वोच्चया आदेश न्यनेमाः कि म्वाः ?
येँ -सर्वोच्च अदालतया प्रधानन्यायाधीश चोलेन्द्र शम्शेर जबरां कांग्रेस सभापति शेरबहादुर देउवां कांग्रेस, माओवादी व मेपिं सांसदया समर्थन कयाः न्ह्याः वनेबलय् छु गल्ती जुल धकाः न्ह्यसः तयादीगु दु ।
संसद विघटनयात कयाः सर्वोच्च अदालतय् न्ह्यानाच्वंगु रिटय् प्रधानमन्त्री केपी शर्मा ओली पक्षं वहस यानाच्वंम्ह अधिवक्ता अग्नि खरेलं प्रतिनिधिसभा विघटन व राष्ट्रपति विद्यादेवी भण्डारीं प्रधानमन्त्री नियुक्त मयाःगु पाय्छि हे खः तकाः तर्क तयेवं प्रधानन्यायाधीश जबरां थ्व न्ह्यसः न्यनादीगु खः ।
वय्कलं न्ह्यसः न्यनेगु झ्वलय् धयादिल, ‘प्रतिनिधिसभाय् दलया जक उपस्थिति जुइ मखु, मेपिं नं उपस्थित जुइगुयात संविधानं स्वीकार यानातःगु दु, अथे जुयाः संविधानया धारा ७६ या उपधारा ५ व २ या दल व स्वतन्त्रया समर्थन धकाः व्याख्या जुयाच्वंगु दु । भचा प्रष्ट यानादिसँ, दलपाखें जक जक कि मेपिंपाखे नं समर्थन जुइफु ? शेरबहादुर देउवां दावी यायेबलय् पार्टी लगायत मेपिं सांसद सहित १४९ म्हेसिया हस्ताक्षर कयाः दावी यानादिल, थुकिं शेरबहादुर देउवां छु गल्ती यात ?’
लिसलय् अधिवक्ता खरेलं धारा ७६ या उपधारा २ स दलया समर्थन कायेमाः धकाः च्वयातःगु दु तर उपधारा ५ स न्ह्याम्हं सांसद न्ह्याखे वंसां जिउ धकाः च्वनामतःगु जिकिर यानादिसें न्ह्यसः थनादिल, ‘देउवां दावी यायेबलय् माओवादी संसदीय दलया निर्णय माःगु तर मेपिनिगु हकय् अथे मजुइगु खः ला ?’
अथे हे प्रधानन्यायाधीश जबरां संविधानया धारा ७६ या उपधारा ५ या निंतिं दावी लायेधुंकाः राष्ट्रपतिं गुम्ह दुजलं कन्हय् भोट तइ वा मतइ धकाः भ्वं यायेमाःगु खः कि मखु धइगु न्ह्यसः न्यँसें धयादिल, ‘गुगु उजुरी आः एमाले व जसपां राष्ट्रपतियाथाय् तःगु दु, उगु उजुरी बी दयेमाः धइगु खँया व्यवस्था संघीय कानुनय् दु ला ? प्रधानमन्त्रीया निंतिं सांसदपिनिगु हस्ताक्षर सहित दावी लायेधुंकाः व उकिया विरुद्धय् राजनीतिक दलतय्सं उजुरी बीधुंकाः राष्ट्रपतिं हस्ताक्षर याःपिं सांसदपिनिगु सनाखत याकेमाः कि म्वाः ?’
अथे हे म्हिगः बहसया झ्वलय् खरेलं प्रधानमन्त्री नियुक्त यायेगु निंतिं राष्ट्रपतिया नामय् परमादेश जारी याये मजिउगु खँ धयादीगु दु । वय्कलं राष्ट्रपतिं याइगु निर्णय व आदेश राष्ट्रपति कार्यालययात बीगु खः धासें टेक्निकल्ली राष्ट्रपतियात परमादेश जारी जुइ फइ मखु, राष्ट्रपति कार्यालययात बिउगु परमादेश राष्ट्रपतियात लागू जुइ मखु धकाः नं दावी यानादिल ।
खरेलया उगु दावी लिपा प्रधान– न्यायाधीश जबरां राष्ट्रपति कार्यालयया नामय् जारी जूगु परमादेश राष्ट्रपतिं कार्यान्वयन यायेम्वाःगु खः ला धकाः न्ह्यसः न्यनादिल । वय्कलं अदालतं परमादेश जारी यात व राष्ट्रपतिं माने याये मखु धाल धाःसा छु जुइ धकाः न्ह्यसः न्यनादिल ।
लिसलय् खरेलं राष्ट्रपति संविधानया संरक्षक जूगुलिं अदालतं अज्याःगु परमादेश जारी याइगु अनुमान थम्हं मयानागु जिकिर यानादिल ।
LEAVE YOUR COMMENTS