चिकुलां हे तांन्वयेगु शुरु

येँ (नेपालभाषा टाइम्स)- थुगुसी चिकुला मफुइवं तांन्वयेगु शुरु जूगु दु । थौंकन्हय् न्हियान्हिथं तापक्रम अप्वया वनाच्वंगुलिं तांन्वःगु महसुस जूगु जल तथा मौसम विज्ञान विज्ञाग मौसम पूर्वानुमान महाशाखां धाःगु दु ।

महाशाखाया कथं चिकुलाया इलय् माक्व वा मवयाः सुक्खापन अप्वःगुलिं याकनं तांन्वयेगु शुरु जूगु खः । पश्चिमी वायु सक्रिय मजूगुलिं ख्वाउँगु अप्वये मफयाः तापक्रम थहां वंगु खँ धाःगु दु । थुगुसी वा वयेकीगु मौसम प्रणाली प्रभावकारी मजूगु खँ नं विभागं धाःगु दु । विभागया कथं प्रि मनसुनया सिजन सतिनावःगुलिं नं तापक्रम अप्वया वंगु खः ।

सामान्यतया नेपालय् चिकुलाय् मंसिर निगूगु वालय् वा वयाः फागुन निगूगु वालय् तक कायम जुयाच्वनीगु खः । स्वनिगः लिसें देय्या थीथी थासय् सिलाचः¥हे तक वा वइगु खःसा थुगुसी सिलाचः¥हेबलय् नं वाः मवःगुलिं यानाः तापक्रम अप्वःगु खँ धाःगु दु ।