सांसद बज्राचार्य बागमतिया संस्कृति, पर्यटन तथा सहकारी मन्त्री नियुक्त
येँ (नेपालभाषा टाइम्स)- बागमति प्रदेश सभाया सांसद शैलेन्द्र वज्राचार्ययात बागमति प्रदेशया संस्कृति, पर्यटन तथा सहकारी मन्त्री नियुक्त याःगु दु । वय्कलं बिहिवाः सनिलय् मन्त्रीपदया सपथ ग्रहण यानादीगु दु । वय्कलं नेपालभाषां शपथ ग्रहणा यानादीगु खः । वय्कः हाम्रो नेपाल पार्टीपाखें सांसद जुयाच्वनादीम्ह खः ।
बागमति प्रदेशया सत्तारुढ गठबन्धनलिसे न्यांगू बुँदाया सहमति लिपा वय्कलं मन्त्री पदया शपथ ग्रहण यानादीगु खः । सत्तारुढ गठबन्धन नेकपा एमाले, नेकपा माओवादी, एकीकृत समाजवादी व हाम्रा नेपाल पार्टी दथुइ बिहिवाः हे न्यागू बुँदाया सहमति जूगु खः । न्यागू बुँदाया सहमतिइ ल्यंदुगु कार्यकालय् सत्तायात स्थायीत्व बियाः न्ह्याःवनेगु खँ न्ह्यथनातःगु दु । सहमति पत्रय् एमालेया बागमति प्रदेश संसदीय दलया नेता जगन्नाथ थपलिया, माओवादी संसदीय दलया नेता शालिकराम जम्कट्टेल, एकीकृत समाजवादीया नेता डा. राजेन्द्रमान श्रेष्ठ व हाम्रो नेपाल पार्टीया नेता शैलेन्द्रमान वज्राचार्यं हस्ताक्षर यानातःगु दु ।
सांसद बज्राचार्य मन्त्री जुइवं आः माओवादीपाखें मुख्यमन्त्री जुयाच्वनादीम्ह शालिकराम जमकट्टेलया सरकारयात बहुमत चूलाइगु जूगु दु । केन्द्रीय सत्ता समिकरणय् दुगु एमाले, माओवादी व एकीकृत समाजवादीया सांसदत जक बागमतिया प्रदेश सत्ता बचे यायेत मगानाच्वंगु खः । आः हाम्रो नेपाल पार्टीया निम्ह सांसद सत्तापक्षय् वनेवं बहुमत खाइगु पक्का जूगु दु । उकिं मुख्यमन्त्री जम्कट्टेल सांसद वज्राचार्ययात सुरुं निसें मन्त्री जुइत प्रस्ताव तया वयाच्वंगु खः ।
११० सदस्य दुगु बागमति प्रदेशय् बहुमत खाकेत ५६ म्ह सांसदत माः । थुकी एमालेया २७, माओवादीया २१ व समाजवादीया न्हय्म्ह सांसद यानाः ५५ म्ह जक दयाच्वंगु खः । आः हाम्रो नेपाल पार्टीं समर्थन यायेवं बहुमतया गाक्क ५७ म्ह सांसद दइगु जूगु दु ।
LEAVE YOUR COMMENTS