प्रमपाखें नं क्षमा याचना

पौया बारे थःत जानकारी मबिउगु प्रमया द्वपं

येँ – भारतं आयात जुइगु तरकारी परीक्षणय् थःत मन्त्रालयया सचिवतय्सं डुबे यात धकाः आपूर्तिमन्त्री मातृका यादवं सार्वजनिक रुपं न्ववानादीगुयां छुं न्हि लिपा हे प्रधानमन्त्री केपी शर्मा ओलीं नं विषादी रोके यायेगु लागिं भारतं छ्वया हःगु पौया बारे थःत इलय् हे सुचं मबिल धकाः कर्मचारी तहया छ्यनय् दोष चीकादीगु दु ।

विषादी परीक्षण रोके या धकाः भारतं पौ छ्वया हःगु खःसां प्रम ओलीं अज्याःगु पौ वःगु हे मदु धकाः सार्वजनिक रुपं न्ववानादीगु खः । तर सञ्चार माध्यमय् भारतं छ्वया हःगु पौया फोटो हे सार्वजनिक जुइवं धाःसा प्रम ओलीं थ्व पौ थःत तकं मक्यँसे गोप्य यानातःगु जुयाः थम्हं मसिल व पौ वःगु मदु धकाः न्ववाये लात धासें माफी फ्वनादीगु दु ।

नेपाल टेलिभिजनपाखें प्रशारण जुइगु ‘जनतासँग प्रधानमन्त्री’ ज्याझ्वलय् न्ववासें वय्कलं थ्व खँ कनादीगु खः ।प्रधानमन्त्रीया हैसियतं थःत उगु पौया बारे जानकारी वये हे माःगु खः धासें वय्कलं सीकं वा मसीकं न्ह्यागु हे रुपं जूसां पौया बारे थःत जानकारी मदुगु जुयाः थः भ्रमय् लानाच्वंगु जुयाच्वन धकाः नं वय्कलं धयादिल ।

पौया बारे थःत छु कारणं जानकारी मवल धइगु बारे आन्तरिक छानबिन जुयाच्वंगु दु धासें वय्कलं उकिया कारण नं सीदइगु आशा प्वंकादिल ।

भारतं दुहां वइगु तरकारीया विषादी परीक्षण यायेगु धकाः सरकारं सम्बन्धित सचिवतय्के न्यनाः जक निर्णय याःगु खः तर लिपा बुझे यानाबलय् नेपाःयाके विषादी परीक्षणया क्षमता हे मदु धइगु खँ सी दत धासें आपूर्ति मन्त्री मातृका यादवं नं थुकिया दोष कर्मचारीयात बियादीगु खः । मन्त्री यादवं सचिवतय्सं याःगु थ्व दोषया कारणं सुनां चाहे जुल धाःसा थःत न्यतालय् दायेफु धकाः नं धयादीगु खः ।

प्रधानमन्त्री छाय् गुमराहय् ?
प्रधानमन्त्री केपी शर्मा ओलीयात तरकारीया विषादी परीक्षण बारे भारतं छ्वया हःगु पौया जानकारी मबिउगु थ्व प्रकरणं यानाः वालुवाटारया सूचना प्रबन्ध बारे नं न्ह्यसः पिहां वःगु दु । वालुवाटारय् प्रधानमन्त्री ओलीयात घेरे याना तःगु छगू तहया राजनीतिक चक्कां वय्कःयात आपालं सूचनापाखें तापाका तःगु दु धइगु हुइनाभुइना जुयाच्वंगु खः ।

आः पिहां वःगु प्रकरणपाखें वय्कःयात अथे सूचनापाखें तापाका तइगु धकाः पिहां वःगु हुइनाभुइना सत्य साबित जूगु खँ सूत्रं धाःगु दु । प्रमयात गुलिखे महत्वपूर्ण सूचना, सञ्चार माध्यम व टेलिफोनपाखें समेत अलग्ग याना तइगु खः धकाः नं खँ पिहां वयाच्वंगु खः ।

खास यानाः प्रमया स्वास्थ्यया त्वहचिनाः वय्कःयात धपेट मजुइमा धासें वय्कःयात सार्वजनिक सम्पर्कपाखें समेत तापाक तयेगु ज्या जुयाच्वन धइगु द्वपं वयाच्वंगु खः ।