स्वनिगलय् न्हिछिया दुने ३० म्हेसिके संक्रमण

येँ (नेपालभाषा टाइम्स) – म्हिगः न्हिछिया दुने स्वनिगलय् जक स्वीम्हेसित कोरोना संक्रमण जूगु पुष्टि जूगु दु । स्वास्थ्य तथा जनसंख्या मन्त्रालयं म्हिगः बिउगु जानकारी कथं स्वनिगःया येँय् २७ म्ह, यलय् निम्ह व ख्वपय् छम्हेसित कोरोना संक्रमण पुष्टि जूगु खः ।

येँय् संक्रमण पुष्टि जूपिं मध्ये शिक्षण अस्पताल महाराजगञ्जय् परीक्षण याःगुलिइ २१ म्ह, राष्ट्रिय जनस्वास्थ्य प्रयोगशालाय् परीक्षण याःगुलिइ न्याम्ह व वीर अस्पतालय् परीक्षण याःगुलिइ छम्हेसिके कोरोना पुष्टि जूगु खः ।

मन्त्रालय कथं म्हिगः देय्न्यंकं यानाः ४७१० म्हेसिया पिसिआर परीक्षण जूगु खःसा थुकी मध्ये २९३ म्हेसिके कोरोना संक्रमण खने दुगु खः । थुपिं मध्ये दकलय् अप्वः कञ्चनपुरय् ३२ म्हेसिके संक्रमण खनेदुगु खःसा रौतहटय् २९ म्हेसिके, येँ, धनुषा व कैलालीइ २७-२७ म्हेसिके संक्रमण खनेदुगु खः ।

अथेहे बाजुराय् २० म्ह, सल्यानय् १५ म्ह, सुर्खेत व महोत्तरीइ १२-१२ म्ह, प्यूठानय् ११ म्ह, डडलधुराय् गुम्ह, सर्लाही व दैलेखय् न्हय्म्ह न्हय्म्ह, बर्दियाय् न्याम्ह, रुकुम पशिचम, अर्घाखाँची व बैतडीइ प्यम्ह प्यम्ह, डोटीइ स्वम्ह, ताप्लेजुङ, झापा, मोरङ, कपिलवस्तु, रुपन्देही, तनहुँ, कास्की, नुवाकोट, रामेछाप, सिन्धुपाल्चोक व यलय् निम्ह निम्ह, पाँचथर, सिराहा, पर्सा, मकवानपुर, बाँके, ख्वप, सल्यान, इलाम, म्याग्दी, धादिङ, बागलुङ, गोरखा, लमजुङ, नवलपरासी, स्यांग्जा व अछामय् छम्ह छम्हेसिके कोरोना पुष्टि जूगु खः ।

थुकिया लिसें नेपालय् कोरोना पुष्टि जूपिं १५ हजार ७८४ म्ह थ्यंगु दुसा कोरोनां सीपिनि ल्याः ३५ म्ह थ्यंगु दु ।

सम्बन्धित बुखँ

LEAVE YOUR COMMENTS