झिन्हुया लिपि कक्षा क्वचाल

ख्वप(नेपालभाषा टाइम्स)÷प्रगति सामुदायिक सिकाइ केन्द्रया ग्वसालय् जूगु झिंन्हुयंकंया लिपि कक्षा क्वचाःगु दु । केन्द्रया ग्वसालय् झिन्हुयंकंया नेपाल लिपि (प्रचलित) व रञ्जना लिपि कक्षा जूगु खः । ख्वप नगरपालिकाया प्रमुख सुनिल प्रजापतिं लिपि कक्षा समापन ज्याझ्वलय् प्रशिक्षार्थीतय्त दसिपौ लःल्हानादिसें लिपि देय्या म्हसीकालिसें सम्पत्ति जूगुलिं उकिया संरक्षण याना तयेमाःगु खँय् बः बियादिल ।

‘लिपि विकास यायेत सलंसः दँया ई काइ’ नगर प्रमुख प्रजापतिं धयादिल, ‘उकिं थज्याःगु सभ्यताया संरक्षण, प्रवद्र्धन यायेगु नापं थुकथंया प्रशिक्षणत निरन्तरता बिया वनेमाःगु झी सकसिगुं कर्तव्य नं खः ।’
नगरपालिकां लिपि संरक्षणया निंतिं स्थानीय पाठ्यक्रमय् तकं दुथ्याकातःगु जानकारी बियादिसें स्यनामिपिंसं थःपिंसं सयेकातःगु ज्ञान ब्वँमिपिंत इनाः ख्वपयात ज्ञान, विज्ञानया केन्द्र दयेकेगु अभियानय् ग्वाहालि यायेत नं इनाप यानादिल ।

ख्वप नगरपालिका ९ वडाअध्यक्ष रवीन्द्र ज्याख्वं इतिहासया महत्वपूर्ण कालखण्डया सिकाइयात न्हूपुस्ताया दथुइ हस्तान्तरण याना यंकेगु ल्याखं नगरपालिकां स्थानीय पाठ्यक्रम निर्माण याःगु जानकारी बियादिल ।

केन्द्रया अध्यक्ष रविन्द्रप्रसाद कुसीया सभापतित्वय् जूगु समापन ज्याझ्वलय् बागीश्वरी कलेजया प्राचार्य धनकुमार श्रेष्ठ, लिपि प्रशिक्षक सरोज गोसाइँ, प्रशिक्षार्थीपिं सुनिता घटुवा व सुरज दिदियां नं नुगःखँ तयादीगु खः ।