यल बालकुमारी देगःया उलेज्या जुल

यल (नेपालभाषा टाइम्स)- राष्ट्रपति रामचन्द्र पौडेलं बुधवाः छगू ज्याझ्वःया दथुइ नकतिनि पुनर्निर्माण जूगु यलया नांजाःगु बालकुमारी देगःया उलेज्या यानादिल । २०७२ सालया तःभुखाचं क्षति जूगु थुगु देगः यल महानगरपालिका व चन्दादाताय् ग्वाहालिं पुनःनिर्माण याःगु खः ।

ज्याझ्वलय् न्ववानादिसें राष्ट्रपति रामचन्द्र पौडेलं सुन्दर प्रकृति व वैभवशाली संस्कृतिं नेपाःयात विश्वया आकर्षणया केन्द्रय् दयेकाबिउगु खँ धयादिल । थ्व झ्वलय् वय्कलं येँ, यल व ख्वपया महत्वपूर्ण ऐतिहासिक सम्पदा पुनःनिर्माण यानाः जीवन्त यायेगु कुतः जुयाच्वंगु तसकं च्वछायेबहःगु ज्या जूगु धासें थज्याःगु ज्यां पर्यटन प्रवद्र्धनय् तःधंगु ग्वाहालि यानाच्वंगु खँ धयादिल ।

‘स्वनिगः कला व बहुसंस्कृतिया वैभवशाली शहर खः । यल महानगरपालिकां यक्व सम्पदा पुनःनिर्माण यानाः जीवन्त यायेत स्वःगु तसकं न्ह्यथनेबहःगु ज्या खः । देय्न्यंकंया स्थानीय तहया दथुइ यल महानगर उदाहरणीय पालिका जुइत सफल जूगु दु । थनया अनुशरण मेमेगु स्थानीय तहं नं यानावनेगु खःसा देय् समृद्ध जुइ धयागु खँ विश्वस्त जुइफइ’ वय्कलं धयादीगु दु ।

ज्याझ्वलय् न्ववानादिसें यल महानगरपालिकाया प्रमुख चिरिबाबु महर्जनं देगः, फल्चा, सतः थेंज्याःगु पुरातात्विक महत्वया सम्पदा दयेकेबलय् सार्वजनिक खरिद ऐन २०६३ इं पंगः थनाच्वंगु धासें थ्व ऐन संशोधन यायेमाःगु खँ धयादिल । थ्व झ्वलय् वय्कलं थःगु कार्यकालय् आःतकया दुने १५५ गू सम्पदा पुनःनिर्माण, जीर्णद्वार यायेधुनागु खँ धयादीगु खः ।

ज्याझ्वलय् बालकुमारी पुनःनिर्माण समितिया अध्यक्ष खड्गलाल महर्जनं देगःया इतिहास व पुनःनिर्माण बारे जानकारी बियादीगु खः । थ्व देगः देगः दनेत ठेक्कां बीबलय् प्यंगू करोड च्यागू लाख तका तुइगु अनुमान यानातःगु खःसा पुनःनिर्माण समितिपाखें दयेकूबलय् मुक्कं निगूत्या करोड खर्च यानाः दयेकूगु खः ।

देगः दनाः अप्वः ध्यबां देगः न्ह्यःनेच्वंगु फल्चा दयेकेगु लिसें देगः परिसरय् चिकं अप्पां सीगु, देगःया प्यखेरं लुखाय् च्वंगु सिंहया जीर्णोद्धार यायेगु, देगःया प्यखेरं च्वंगु पःखाः स्यंकाः अन तयातःगु मेमेगु द्यःया मूर्तियात व्यवस्थित ढंगं तयेगु ज्या नं याःगु खः ।

यलया पीगं द्यः बालकुमारी स्वनिगःया नेवाःतय्सं तसकं हनाबना तयातःम्ह द्यः खः । थन दँय्दसं पाहाँचःह्रेबलय् काःम्ह सल ब्वाकेगु जात्रा जुइ ।

सम्बन्धित बुखँ

LEAVE YOUR COMMENTS