सरकार विरुद्ध मिसापिनि मार्चपास

येँ – प्रधानमन्त्री केपी ओलीया प्रतिगमन व देय्न्यंकं न्यना वनाच्वंगु मिसा हिंसाया विरुद्ध म्हिगः येँय् मिसापिंसं ‘महिला मार्च’ पिकाल । थनया बसन्तपुलिं शुरु जूगु मार्च रत्नपार्क जुयाः सिंहदरवारय् वनाः धर्ना च्वंगु खः ।

महिला मार्चय् सरकारं मिसा हिंसा, बलात्कार व हत्या पनेमफुगु धासें तं प्वंकेगु ज्या जूगु खः । ‘प्रतिगमन विरुद्ध बृहत् नागरिक आन्दोलन’ नांया ब्यानरय् प्रदर्शनय् कुहां वःपिंसं मिसा हिंसा बन्द या, बलात्कारीयात सजायँ बिउ, हत्यारा मालाः कारबाही या धकाः माग याःगु खः ।
मार्चय् ब्वति काःपिंसं बलात्कार यानाः स्याःपिं कञ्चनपुरया निर्मला पन्त, बैतडीया भगिरथी भट्टयात न्याय बीमाःगु माग याःगु दु । उमिसं न्हिथं मिसा लिसे मिसामस्त असुरक्षित जूसां नं सरकारं उमित न्याय बीमफुगु धासें आक्रोश नं प्वंकूगु दु ।

प्रदर्शनकारीतय्सं प्रतिकारात्मक रुपं शवयात्रा नं याःगु खः गुकी एकोहोरो शंख पुयाः प्रतिगमनया विरोध याःगु खःसा तुयुगु कापः छ्यनय् पुइगु लिसें प्रतिकारात्मक रुपं शवयात्रा नं याःगु खः। ज्याझ्वलय् न्ववासें महिला मार्चया वक्तातय्सं ओलीं मिसापिनिगु सःयात सम्मान यायेमफुगु द्वपं बिउगु दु ।

लुँमधिइ याःगु ज्याझ्वलय् न्ववासें च्वमि डा.अर्चना थापां धयादिल, ‘मिसापिंसं न्ववात धाःसा झीगु सरकारं उकियात मिसापिनिगु ट्याउँ–ट्याउँ धाइ । छु झीसं थज्याःगु हे प्रजातन्त्रया कल्पना यानागु खः ला ?’

नेतृ विन्दा पाण्डें छुं ई न्ह्यः मिसातय् पक्षय् सःथ्वयेकूगु झ्वलय् उकियात लिसः बीथें प्रधानमन्त्रीं मिसापिंत ख्याच्वः बिसें ‘मिसातय्सं अप्वः ट्याउँ–ट्याउँ यायेमते’ धयादीगु खः ।