जनकवि दुर्गालालया न्हूदँया म्येँ

येँ (नेपालभाषा टाइम्स) – झी जनकवि दुर्गालाल श्रेष्ठया च्वसां थुगुसी न्हूदँया लसताय् भिंतुना म्येँ पिदनीगु जूगु दु । नेपाल संवत् राष्ट्रिय न्हूदँ समारोह समितिं जनकवि दुर्गालालया न्हूदँया भिंतुना म्येँ पिथनेत्यंगु खः ।

नेपालभाषा मंकाः खलःया नायः तकं जुयादीम्ह जनकवि श्रेष्ठया म्येँ न्हूदँया लसताय् विश्वन्यंकं न्हूदँ हनेत व भिंतुना देछायेकथं पिथनेत्यनाु न्हूदँ समारोह समितिं धाःगु दु । जनकवि श्रेष्ठया भिंतुना म्येँ मंकाः म्येँकथं पिथनेगु तयारी यानाच्वंगु दुसा उगु म्येँया म्युजिक भिडियो नं दयेकेगु ज्या जुइगु समितिं जानकारी बिउगु दु ।

थुगुसी कोरोना भाइरसया महामारीया कारणं सार्वजनिक रुपं न्हूदँया लसताय् छुं नं ज्याझ्वः मजुइगु अवस्थाय् सामाजिक संजालपाखें हे भिंतुना देछायेकथं उगु भिंतुना म्येँ दयेकेगु ज्या जूगु समितिं धाःगु दु ।