गुथि विधेयक विरोधी प्रदर्शनय् दर्जनौं घाःपाः, स्वम्ह अस्पताल भर्ना
येँ – सरकारं हःगु गुथि सम्बन्धी विधेयकया विरोधय् आइतवा: स्वनिगःया नेवाःतय्सं याःगु शान्तिपूर्ण प्रदर्शनय् प्रहरीं बर्बरतापूर्वक हस्तक्षेप यासें लाठीचार्ज व लःया फोहोरां छ्वाकूगु दु । उकी लानाः स्वम्ह प्रदर्शनकारीया छ्यों तज्याःगु दुसा मेपिं दर्जनौं प्रदर्शनकारीत घाःपाः जूगु दु । छ्यों तज्याःपिं निम्ह प्रदर्शनकारीत महेश कारंजित व कृष्ण मानन्धरयात अन्नपूर्ण माइतीघर मण्डलाया न्यूरो अस्पतालय् यंकाः वासः याःगु दुसा सजीव वज्राचार्ययात नर्भिक अस्पतालय् यंकाः वासः याःगु दु ।
प्रहरीया लाठीचार्जय् लानाः राजभाई जकःमि, राजेन्द्र महर्जन आदि लगायत दर्जनौं प्रदर्शनकारीया म्हय्, ब्वहलय् व तुतिइ घाः लाःगु दु । उकथं हे प्रहरीं नेवाः न्ह्यलुवा डा. महेशमान श्रेष्ठ लगायत विकास महर्जन, कृष्ण भायो व अनिश वैद्ययात ज्वना यंकूगु दु । ज्वना तःपिंत अनामनगरया प्रहरी चौकीइ कुनातःगु दु । वय्कःपिंत मानव अधिकारवादी व वकिलतय्सं नं वनाः नापलाःगु खः । ज्वना तःपिं सकसितं सनिलया ५ बजे त्वःता हःगु दु ।
सरकारं हःगु गुथि सम्बन्धी विधेयकया विरोध यासें माइतीघर मण्डलाय् नेवाःतय्गु स्वतःस्फूर्त प्रदर्शन जूगु खः । मण्डलाय् न्हिनय् १२ निसें १ बजे तक प्रदर्शन यायेगु ग्वसाः दुगु खःसा प्रहरीं १ बजे जुइ न्ह्यः हे हस्तक्षेप शुरु याःगु खः ।
प्रदर्शनकारीतय्सं उकिया प्रतिकार यायेवं प्रहरीं लःया फोहोरां छ्वाकाः लाठीचार्ज समेत याना बिल । आपालं प्रदर्शनतय्सं फोहोराया वास्ता मयासे न्ह्यःने हे च्वनाः नाराबाजी यानाच्वंगु खःसा गुलिसिनं प्रहरीया दमकलय् अप्पां नं कयेकूगु खः ।
आइतवा: भोटो जात्रा स्वयेत वहे लँपु जुयाः राष्ट्रपतिया सवारी दुगु जुयाः प्रहरीं न्ह्याथे यानाः नं प्रदर्शनकारीतय्त चीकेत स्वःगु खः । प्रहरी दमनया विरोधय् थाैं सनिलया ५ बजे येँया असनय् मुनाः न्हूसतक तक जुलुस प्रदर्शन दु।
LEAVE YOUR COMMENTS