ज्यापु कल्याणकारी कोषपाखें दाफा गुरु हन

येँ – ज्यापु कल्याणकारी कोषपाखें येँ देय्या परम्परागत त्वाःया दाफा गुरुपिंत हनेज्या याःगु दु । कोषपाखें थुगुसी परम्परागत त्वाःया गुरुपिं हनेगु झ्वलय् असं त्वाःया मू गुरु कृष्णबहादुर महर्जन व ब्रम्ह त्वाः नःबहाःया दगू दाफा खलःया मचाभाई डंगोलयात हनेज्या याःगु खः ।

कोषं समुदायया निंतिं समर्पित जुयाः भाषिक, सांस्कृतिक उत्थानया ज्याय् मदिक्क योगदान बिया वयाच्वनादीपिं परम्परागत त्वाःया निम्ह दाफा गुरुपिंत दँय्दसं हनेगु झ्वलय् थुगुसी वय्कःपिंत म्हति झिंन्याद्वः तका दांया ‘रत्न–आशा गुरु सिरपाः’ लःल्हाःगु खः ।

कोषया नायः सुवर्णमान डंगोलया सभापतित्वय् जूगु ज्याझ्वलय् वय्कलं सम्मानित गुरुपिंत दोसल्लां न्ययेकादीगु खःसा ज्याझ्वःया मूपाहां येँ महानगरपालिकाया प्रमुख विद्यासुन्दर शाक्यं हनापौं लःल्हानादीगु खः । ज्यापु महागुथि येँ महानगर समितिया नायः बाबुराजा महर्जनं चेक लःल्हानादिल ।

ज्याझ्वलय् नवासें मूपाहां येँ मनपा प्रमुख शाक्यं सम्मानयात ध्यबाय् तुलना मयायेत धासें स्थानीय सरकार वये धुंकाः भाषा, संस्कृति व तजिलजि संरक्षण यायेगु याय् येँ महानगरपालिकां विशेषकथं जोड बिया वयाच्वनागु धासें स्थानीय समुदायं नं थज्याःगु विषयय् ध्यान तया वनाच्वंगु खँय् थः तसकं लय्ताः धयादिल ।

अथे हे कोषया लिउछ्यांजे नापं येँ मनपा २३ वडाया वडाअध्यक्ष मचाराजा महर्जनं स्थानीय तहय् निर्वाचित जनप्रतिनिधिपिं निर्वाचित जुया वये धुकाः थःपिं सक्रिय रुपं वडाया विकास निर्माणय् ज्याय् लगे जुयाच्वनागु धासें वडावासीतय्सं नं थज्याःगु खँय् विशेष रुपं ध्यान बिया वनेमाः धयादिल ।

सांस्कृतिक उत्थानय् योगदान बिया वयाच्वनादीपिं निम्हेसित दँय्दसं थुकथं हनेज्या याना वयाच्वंगु कोषं आकिवंनिसें थप स्वंगू ज्याझ्वः हयेत्यनागु कोषया छ्यांजे बाबुराजा महर्जनं जानकारी बियादिल ।

सम्बन्धित बुखँ

LEAVE YOUR COMMENTS