म्युजिक भिडियोय् कुताक्षर
येँ(नेपालभाषा टाइम्स)- नेपालभाषाया म्युजिक भिडियो ख्यलय् दकलय् न्हापांखुसिइ कुताक्षर छ्यलाः भिडियो दयेका पितब्वज्या याःगु दु । नेपालभाषा एकेदेमिया चान्सलर यज्ञरत्न धाख्वाः मूपाहाँ कथं झायादीगु छगू ज्याझ्वलय् पितब्वज्या जूगु “ मांअबु पिन्सं ” बोलया म्युजिक भिडियोलय् थथे कुताक्षर छ्यलातःगु खः । थथे कुताक्षर छ्यलेगु ज्यायात प्रशंसा यानादिसे मूपाहाँ धाख्वाः नं संगीतख्यलय् मचा प्रतिभायात नं हःपाः बिइगु कथं दान्यहिरा सिरपाय् मचा प्रतिभाया निंतिं सिरपा फ्यानागु खँ न्ह्यथनादिल ।
प्रेम महर्जनं च्वयादीगु थ्व म्ये निशा देशारं हालादीगु खः । विनय महर्जनं लसय् हनादीगु थ्व म्येया निंतिं किरण महर्जनं कुताक्षर दयेकादीगु खः । लुजः सिंहया सम्पादन व छायाँकन दुगु थुगु भिडियोय् अन्जलि महर्जन, अमिर स्थापित व प्रेक्षा अधिकारीया नापनापं बाल कलाकार आरादिता श्रीया अभिनय दुथ्यानाच्वंगु दु ।
विहिबार यलया क्रोधकला शिरोमणि फाउण्डेशनय् जूगु पितब्वज्याय् प्रदेश सांसद रामकृष्ण चित्रकार, ज्यापु समाजया न्वकु सन्तमान महर्जन, लोकसाहित्य परिषदया नायः राजित बहादुर श्रेष्ठ, क्रोधकला शिरोमणि फाउण्डेशनया कजि राकेश अवाले, नेपालभाषा एकेदेमिया दुजः विजयरत्न असंबरे, म्येहालामि निशा देशार व नेवाः आइडल सिजन २ या हना महर्जनपिंसं नुगःखँ तयादीगु खः ।
LEAVE YOUR COMMENTS