‘नासा’ सम्बन्धी समाचारय् द्वंगु छु खः ?

येँ (नेपालभाषा टाइम्स)- नेपाःया पत्रकार लिसें सगरमाथा आरोही मय्जु रोजिता बुद्धाचार्यं अमेरिकाया अन्तरिक्ष अनुुुसन्धान सम्बन्धी संस्था नासापाखें पूर्ण छात्रवृत्ति कयाः ब्वनादिल धकाः नेपाली सञ्चार ख्यलय् बय्बय् जुइक पिहां वःगु समाचारया खण्डन स्वयम् बुद्धाचार्यपाखें हे जुइवं नेपाःया समाचार एजेन्सी लिसें सञ्चार माध्यमतय्गु विश्वनीयताय् समेत न्ह्यसः पिहां वःगु खँ धयाहःगु दु ।

बुद्धाचार्यं म्हीग सामाजिक सञ्जालपाखें थःगु धापू पोष्ट यासें थम्हं नासापाखें पूर्ण छात्रवृत्ति कयाः ब्वनागु मखु धकाः स्पष्ट यानादीगु खः । वय्कः थौंकन्हय् बेलायतया लिभरपुल शहरय् दु धासें थःगु बारे पिहां वःगु समाचार खनाः थः अजूचायाच्वनागु खँ नं वय्कलं कनादीगु दु । अथे खःसा वास्तवय् धाथें जूगु छु ले ? थ्व समाचारया यथार्थ खँ छु खः ?

‘नेपालभाषा टाइम्स’ पाखें वय्कःयात मेसेन्जर मार्फत् थ्व न्ह्यसः तयाबलय् वय्कलं लिसलय् धयादीगु दु, ‘यदि नासाया लागिं अपरेट जूगु स्पेश टेलिस्कोप साइन्स इन्ष्टिच्युटय् पूर्ण छात्रवृत्ति कयाः ब्वंम्ह न्हापांम्ह नेपाः विद्यार्थी धाःगु खःसा ठीक खः । नासापाखें पूर्ण छात्रवृत्ति कयाः ब्वंम्ह न्हापांम्ह नेपाःमि विद्यार्थी नासाया लागिं प्रस्थान धकाः जिगु नां तयाः पिहां वःगु समाचार चाहिँ गलत खः ।’

नेपाःया सञ्चार माध्यमतय्सं ‘नासा’ व ‘नासाया लागिं अपरेट जुइगु स्पेश टेलिस्कोप साइन्स इन्ष्टिच्युट’ दथुया विभेद थुइके मफुगु खनेदत ।