दान्यहिरा सिरपाः लःल्हात
यल – भजन शिरोमणिनापं म्येँ हालामि व लय्चिनामि किरण शाक्ययात थुगुसीया दान्यहिरा जीवंकाःछि सिरपाः लःल्हाःगु दु । थुकिया लिसें संगीत ख्यलय् विशेष योगदान बिया वयाच्वंपिं संगीतकार गोविन्द ह्युमत, गायक पवित्र कसाः व म्येँ च्वमि वंशीधर वज्राचार्ययात दान्यहिरा संगीत हःपाः सिरपाः लःल्हाःगु दु ।
नेपालभाषा एकेदेमिया ग्वसालय् मंगलवाः जूगु छगू ज्याझ्वःया दथुइ मूपाहां शताब्दीपुरुष सत्यमोहन जोशीं सिरपाः लाःपिंत दसिपौ लःल्हानादिलसा सिरपाःया दाता एकेदेमिया उपकुलपति यज्ञरत्न धाख्वां दां सिरपाः लःल्हानादीगु खः । एकेदेमिया चान्सलर चित्तरञ्जन नेपालीं स्वां देछायादीगु खः ।
दान्यहिरा जीवंकाःछि सिरपाः न्यय्द्वः तका व दसिपौया खःसा दान्यहिरा संगीत हःपाः सिरपाः म्हतिं झिंन्हय्द्वः तका व दसिपौसहितया खः ।
दँय्दसं बिया वयाच्वंगु दान्यहिरा सिरपाः थुगुसी संगीत विधाय् बिउगु खः । थुगुसीया दान्यहिरा सिरपाः त्याकादीम्ह भजन शिरोमणि किरण शाक्यं २६ गू भजन सिडी पिकाये धुंकूगु दु ।
८३ दँया वय्कः न्हय्गू दशक न्ह्यव निसें संगीत ख्यलय् लगे जुया च्वनादीम्ह खः । अथेहे हःपाः सिरपाः त्याकादीम्ह स्वम्हं नेपालभाषा संगीत ख्यलय् लोकंह्वाःपिं खः ।
ज्याझ्वलय् एकेदेमिया उपकुलपति धाख्वां च्वयादीगु निगू बाखं सपूm ‘हिराया मू’ व ‘द कोवार्ड’ नापं एकेदेमिया ख्वाःपौ ‘नेवाः प्रज्ञा–३’ नं पितब्वज्या याःगु खः । पितब्वज्या जूगु सपूmया बारे प्रा. डा. चन्द्रमान वज्राचार्य, प्रा. प्रेमशान्ति तुलाधर व नांजाःम्ह अनुवादक डा. तेजरत्न कंसाकारं नवानादीगु खः ।
LEAVE YOUR COMMENTS