यल १६ वडापाखें वज्राचार्य पुजाविधियात ग्वाहालि

यल- यल महानगरपालिका वडा नंं १६ पाखें थनया वज्राचार्य पुजाविधि अध्ययन समितियात आर्थिक ग्वाहालि याःगु दु । यल मनपा १६ वडां समितिपाखें दँय्दसं न्ह्याका वयाच्वंगु वज्राचार्य पुजाविधि प्रशिक्षण ज्याझ्वःया निंतिं उगु आर्थिक ग्वाहालि याःगु खः ।

छुं दिं न्ह्यः जक नामसंगीति पर्वयात आर्थिक ग्वाहालि याःगु १६ वडापाखें समितियात नं न्यागू लख तका आर्थिक ग्वाहालि याःगु खः । न्हना वनेत्यंगु परम्परायात निरन्तरता बीगु व वज्रयान पुजाविधिइ न्हू पुस्तायात आकर्षित यायेगु ल्याखं उगु आर्थिक ग्वाहालि लःल्हाःगु खः । १६ वडाअध्यक्ष निर्मलरत्न शाक्य, वडासदस्यपिं सुप्रभा वज्राचार्य, पंचवज्र वज्राचार्यं मंकाःकथं उगु आर्थिक ग्वाहालि समितिया अध्यक्ष दीपक वज्राचार्ययात लःल्हानादीगु खः ।

वडाअध्यक्ष शाक्यं नेवाः बौद्ध समाजय् जन्मनिसें मृत्युतकया इलय् याइगु संस्कार, संस्कृति, परम्परा दक्वं छुं नं छुं कथंया पुजानाप स्वानाच्वंगु व थुकी वज्राचार्य गुरुजुपिनिगु सहभागिता दयेमाःगु नापं न्हू पुस्ता उत्पादन याये फयेमा धइगु ल्याखं आर्थिक ग्वाहालि यानागु खँ कनादिल ।

समितिया अध्यक्ष वज्राचार्यं ज्ञान, विधि व पुजाया महत्व पुस्तान्तरण मजुया वंगुलिं छगू इलय् लोप जुइगु अवस्थाय् थ्यनेधुंकूगुयात ल्यंकेकथं प्रशिक्षण न्ह्याका वयाच्वनागु जानकारी बियादिल ।

वंगु नीन्यादँ न्ह्यवंनिसें समितिं दान, चन्दा व पुजापाठपाखें प्राप्त आर्थिक ग्वाहालिपाखें आतकया दुने सछि स्वयां अप्वःसित पुजाविधिया प्रशिक्षण बीधुंकूगु दु ।
थौं स्वयां २६ दँ न्ह्यः स्थापना जूगु समितिं दँय्दसं खुलायंकंया वज्राचार्य पुजाविधि प्रशिक्षण बिया वयाच्वंगु दु ।