यःसिं थन, येँयाः शुरु (किपा स्वयादिसँ)

येँ(नेपालभाषा टाइम्स)- थनया हनुमानध्वाखाय् म्हिगः सुथय् यःसिं थंगु दु । यःसिं थनेवं येँ देय्या दकलय् ताःहाकःगु व तःजिगु नखः यँयाः नं शुरु जूगु दु । म्हिगः सुथय् ७ः१७ ताः इलय् यःसिं थंगु खः । यःसिं इलय् हे थंगु खःसां थुगुसी पूवंक थनेत धाःसा गाक्कं ई काल । यःसिं थनेत झण्डै घौछि धइथें ई काःगु खः । यःसिं थनेगु झ्वलय् प्यक्वःतक खिपः चबूगुलिं थनेत थाकुगु खः ।

खिपः पुलांगु जुयाः चनेधुंकूगुलिं थथे खिपः चबूगु खः । यदि यःसिं च्वये थहां वनेधुंकूगु इलय् खिपः चबूगु जूसा दुर्घटना जुइफुगु खः । यःसिं थनेगु खिपः पुलां जूगुलिं छुं दँ न्ह्यव हे गुथि संस्थानयात खिपः मेगु बीत इनाप याःगु खःसां आःतक खिपः मबिउनिगु सम्बन्धित गुथियारतय्सं धाःगु दु ।

यःसिं थनेवं म्हिगः हे पुलुकिसि, हल्च्वया श्री आकाशभैरव, मजिपाः लाखे, महाकाली प्याखं पिथनेगु नापं द्यः ब्वयेगु नं शुरु जूगु दु । म्हिगः हे दछियंकं मदुपिं थः छेँजःया लुमन्तिइ उपाकू नं वनेगु ज्या जुल । यँेयाःया झ्वलय् कन्हय् क्वःने याः जुइ । थ्वकुन्हु श्रीकुमारि, श्रीगणेश व श्रीभैरवया खः क्वःनेपाखे साली । द्यः साला हयाः याः न्यायेकेवं बहनि दागिं वनेगु व बौमत नं यंकी ।