द्वारिकालालया नां मतःगु खँय् आपत्ति

येँ – नेपाल सरकारं पिथंगु छगू पाठ्यसफुतिइ दुथ्यानाच्वंगु म्येँय् वरिष्ठ संगीतकार व गायक मदुम्ह द्वारिकालाल जोशीया नां मतःगु धासें वय्कःया छेँजःपिंसं आपत्ति प्वंकूगु दु । नेपाल सरकारया शिक्षा मन्त्रालयपाखें हालय् जक स्वीकृत यानाः पिथंगु खुगू तगिंया छगू सफुतिइ दुथ्यानाच्वंगु लोकभाकाया म्येँय् थः अबुया नां उल्लेख मयाःगु धासें वय्कःया म्ह्याय्पिंसं आपत्ति प्वंकूगु खः ।

मन्त्रालयपाखें स्वीकृत यानाः पिथंगु खुगूगु तगिंया ‘हेल्थ, फिजिकल एजुकेशन एण्ड क्रियटिभ आर्टस्’ पाठ्यसफुतिइ लोक भाकाया धुनय् ‘रेशम फिरिरि …..’ धाःगु म्येँ दुथ्याकाःगु खः । पाठ्य सफुतिइ दुथ्यानाच्वंगु म्येँय् संकलक छम्हेसिया नां जक न्ह्यथनातःगु धासें मदुम्ह जोशीया म्ह्याय्पिं लसता जोशी व भिंतुना जोशीं आपत्ति प्वंकादीगु खः ।

लोक धुनय् आधारित उगु म्येँ नेपाःमि जक मखसे विदेशीतय् दथुइ नं अतिकं लोकं ह्वाः । उगु म्येँ संकलन गायक बुद्धि परियारं यानादीगु खःसा उगु म्येँय् मदुम्ह द्वारिकालाल जोशी व सुन्दर श्रेष्ठं सः बियादीगु खः ।

गुगु म्येँ संकलन जक यानां मजिउ, उकियात आम श्रोताया दथुइ तक थ्यंके गायकया तःधंगु भूमिका दयाच्वनी । तर सरकारं पिथंगु खुगू तगिंया सफुतिइ म्येँ संकलन यानादीम्ह परियारया नांजक न्ह्यथनातःगु व म्येँ हालामिया बारे छुं नं खँ न्ह्यथनामतःगु धासें मदुम्ह जोशीया म्ह्याय्पिंसं आपत्ति प्वंकादीगु खः ।

नेपाःया न्हापांगु राष्ट्रिय गान चक्रपाणि चालिसें च्वयादीगु खँ सकसिनं सिउ, तर उकियात लय्चिनादीम्ह बखतबहादुर बुढापिर्थी खः धइगु यक्वसिनं सिउगु खइमखु । अथे हे विश्वय् नेपाःयात म्हसीकीगु ‘रेशम फिरिरि …..’ म्येँ संकलन यायेगुलिइ नं स्वम्हं श्रष्टाया योगदान उतिकं दु । तर मन्त्रालयपाखें पिथंगु सफुतिइ संकलक छम्हेसियागु जक नां न्ह्यथनेगु धइगु सरकारया गल्ती खः वा श्रष्टाप्रतिया अपमान खः धकाः नं वय्कःपिंसं न्ह्यसः थनादीगु दु ।

सम्बन्धित बुखँ

LEAVE YOUR COMMENTS