नेकां–माओवादी आशंका

येँ (नेपालभाषा टाइम्स)-नेपाली कांग्रेसया नकतिनि क्वचाःगु महासमिति बैठकं याःगु थीथी निर्णयबारे नेकपा माओवादी (केन्द्र) या स्थायी समितिया बैठकय् विशेष चर्चा जूगु दु । म्हिगःनिसें शुरु जूगु माओवादी स्थायी समितिया बैठकय् थःलिसे गठबन्धन यानाः सरकारय् दुथ्यानाच्वंगु नेपाली कांग्रेसं आः वइगु चुनावय् माओवादीलिसे गठबन्धन यायेगु मखु धइगु प्रस्ताव पारित याःगु जक मखुसें माओवादीं याःगु जनयुद्धया समेत आलोचना यानातःगु कारणं कांग्रेसप्रति माओवादी नेतृत्व आशंकित जूगु खँ धाःगु दु ।

पार्टीया महासचिव गगन थापां आः वइगु छुं नं तहया चुनाव सुंलिसे गठबन्धन यानाः मखुसें थः याकःचां हे ल्वायेगु धकाः प्रस्ताव तःगु खःसा महासमितिं उगु प्रस्तावयात पारित याःगु खः । उगु हे महासमिति बैठकय् सरकारय् समेत दुथ्याःम्ह कांग्रेसया उपसभापति पूर्ण खड्कां हःगु प्रतिवेदनय् माओवादीं न्ह्याकूगु सशस्त्र द्वन्द्वं यानाः देशया विकास यक्व लिउने लिज्यां वंगु दु धकाः च्वयातःगु दु । माओवादी सशस्त्र विद्रोहया कारणं आपालं ल्याय्म्ह नेपालय् च्वने मफयाः विदेशय् पलायन जूगु खँ नं धयातःगु दु ।
सूत्रं धाःकथं म्हिगः च्वंगु माओवादी स्थायी समितिया बैठकय् खड्काया थ्व प्रतिवेदनया आशय छु खः धकाः कांग्रेस समक्ष न्ह्यसः तयेमाः धकाः समेत खँ पिहां वःगु खः । कांग्रेसया थ्व प्रतिवेदनं माओवादीया जनयुद्धं यानाः देशय् वःगु हिउपाःयात कांग्रेसं आत्मसात याये मफुत धकाः नं चर्चा जूगु खः ।

लुमंकेबहः जू, कांग्रेसया थ्वहे महासमिति बैठकय् छथ्वः ब्रम्हू व क्षेत्री थरयापिं दुजःतय्सं नेपाःयात हिन्दू राष्ट्र हे कायम यायेमाः धकाः हस्ताक्षर संकलन नं याःगु खः । तर पार्टीं उकियात स्वीकार धाःसा मयात ।

छखे अनौपचारिक रुपं थज्याःगु हस्ताक्षर संकलन यायेगु व मेखे औपचारिक रुपं जनयुद्धया उपलब्धीयात अस्वीकार यायेगु कांग्रेसया थ्व ज्यां यानाः आः कांग्रेस नं प्रतिगामी कित्ताय् वनेत्यंगु खः लाकि धइगु आशंका समेत पिहां वःगु खँ सूत्रं धाःगु दु ।

एमालें छु धाइ ?
सत्तारुढ दल माओवादी व कांग्रेस दथुइ पिहां वःगु थ्व सैद्धान्तिक मतभेदं सरकारयात छु लिच्वः लाइ धकाः नं विश्लेषण याना हःग दु । छुं जुयाः थ्व कचवंपाखें सरकार प्रभावित जुल धाःसा विपक्षी एमालेयात अवसर वये फइगु अनुमान समेत याना हःगु दु ।

 

सम्बन्धित बुखँ

LEAVE YOUR COMMENTS